ផ្លឹស-ខេអេក ញូវ

ចិន និងអាមេរិកឯកភាពគ្នាលើកិច្ចខិតខំប្រឹងប្រែងរួមគ្នាដើម្បីដោះស្រាយបញ្ហាជាក់លាក់នៅក្នុងវិស័យសេដ្ឋកិច្ច និងពាណិជ្ជកម្ម

សង្គម
June 4th, 2021 (4 years)
Views: 143
Share

បរទេស៖ មន្ត្រីនាំពាក្យក្រសួងពាណិជ្ជកម្មចិន កាលពីថ្ងៃព្រហស្បតិ៍ បាននិយាយថា ប្រទេសចិន និងអាមេរិកបានចាប់ផ្តើមប្រស្រ័យទាក់ទងគ្នាជាធម្មតានៅក្នុងវិស័យសេដ្ឋកិច្ច និងពាណិជ្ជកម្មដោយបានឯកភាពគ្នាលើកិច្ចខិតខំប្រឹងប្រែងរួមគ្នាដើម្បីដោះស្រាយបញ្ហាជាក់លាក់មួយចំនួនតាមមធ្យោបាយជាក់ស្តែង។

ថ្លែងពាក់ព័ន្ធនឹងកិច្ចពិភាក្សាតាមអ៊ីនធឺណិតកាលពីពេលថ្មីៗនេះរវាងក្រុមមន្រ្តីចិន និងមេរិកនោះ លោក ហ្គាវ ហ្វេង (Gao Feng) មន្ត្រីនាំពាក្យក្រសួងពាណិជ្ជកម្មចិន បាននិយាយថា ទំនាក់ទំនងរវាងភាគីទាំងពីរបានចាប់ផ្តើមដោយរលូន។

សូមរម្លឹកថា ឧបនាយករដ្ឋមន្រ្តីចិន លោក លីវ ហ៊ី (Liu He) បានជួបពិភាក្សាតាមអ៊ីនធឺណិតជាមួយតំណាងផ្នែកពាណិជ្ជកម្មរបស់អាមេរិក លោកស្រី ខាធើរីន ថាយ (Katherine Tai) កាលពីថ្ងៃទី២៧ ខែឧសភានិងជាមួយរដ្ឋមន្ត្រីហិរញ្ញវត្ថុអាមេរិក លោកស្រី ចាណេត យេលែន (Janet Yellen) កាលពីថ្ងៃទី០២ ខែមិថុនា។

លោក ហ្គាវ បានបញ្ជាក់ថា ដោយផ្អែកលើភាពស្មើគ្នា និងការគោរពគ្នាទៅវិញទៅមក ភាគីទាំងពីរបានផ្លាស់ប្តូរយោបល់គ្នាលើបញ្ហាជាច្រេីនរួមមានទំនាក់ទំនងពាណិជ្ជកម្ម និងសេដ្ឋកិច្ចទ្វេភាគី, ស្ថានភាពម៉ាក្រូ និងគោលនយោបាយក្នុងស្រុក។

មន្ត្រីនាំពាក្យក្រសួងពាណិជ្ជកម្មចិនបានបន្ថែមថា ភាគីទាំងពីរបានឯកភាពគ្នាថា ទំនាក់ទំនងផ្នែកសេដ្ឋកិច្ច និងពាណិជ្ជកម្មរវាងចិន និងអាមេរិកមានសារៈសំខាន់ណាស់ហើយមានវិស័យជាក់លាក់ជាច្រើនដែលប្រទេសទាំងពីរអាចសហការគ្នាបាន។

យោងតាម លោក ហ្គាវ ភាគីទាំងពីរបានឯកភាពគ្នាថា ការពិភាក្សាគ្នានោះមានលក្ខណៈវិជ្ជាជីវៈ, ស្មោះត្រង់ និងស្ថាបនា៕

អត្ថបទទាក់ទង