ផ្លឹស-ខេអេក ញូវ

អាកាសធាតុប្រែប្រួល ម៉ាក់ប៉ាគួរដឹងវីធីការពារកូនពីជំងឺរលាកទងសួត

សម្រស់ជីវិត
December 3rd, 2021 (3 years)
Views: 535
Share

ជំងឺរលាកទងសួតភាគច្រើនកើតលើអាអូនអាយុក្រោម ២ឆ្នាំ ហើយច្រើនតែកើតនៅក្នុងអាកាសធាតុត្រជាក់ៗដូចសព្វថ្ងៃនេះ។ ជំងឺរលាកទងសួតនេះ អាចវិវត្តពីស្រាលទៅធ្ងន់ធ្ងរ ជាហេតុម៉ាក់ៗប៉ាត្រូវបង្កើនការប្រុងប្រយ័ត្នបន្ថែមចំពោះសុខភាពកូន ពិសេសប្រព័ន្ធផ្លូវដង្ហើមក្នុងរដូវនេះ។

ជំងឺរលាកទងសួតបង្កឡើងដោយពពួកវីរុស Respiratory syncytial virus និងខ្លះទៀតអាចបង្កឡើងដោយពួកមេរោគ Adenovirus ។ ករណីជំងឺនេះ ភាគច្រើនមានសភាពស្រាល និងអាចព្យាបាលជាសះស្បើយធម្មតាវិញក្នុងរយៈពេលចាប់ពី ២-៣សប្ដាហ៍ ប៉ុន្តែក្មេងៗខ្លះ ក៏អាចវិវត្តទៅជាករណីធ្ងន់ធ្ងរទាមទារឱ្យសម្រាកព្យាបាលនៅមន្ទីរពេទ្យក៏មាន។

រោគសញ្ញានៃជំងឺរលាកទងសួតលើកុមារ
ចំពោះរោគសញ្ញាដំបូងនៃជំងឺរលាកទងសួត គឺប្រហាក់ប្រហែលនឹងជំងឺផ្ដាសាយទូទៅដែរដូចជា ហៀរសម្បោរ និងក្អក។ ប៉ុន្តែ វាក៏អាចលេចចេញនៅសញ្ញាបន្ទាប់បន្សំផ្សេងៗទៀតដូចជា៖

• ក្ដៅខ្លួន
• ក្អកស្ងួត (ក្អកមិនបាត់)
• ពិបាកញ៉ាំអាហារ
• ដង្ហក់
• ឡើងស្វាយ (ក្នុងករណីធ្ងន់ធ្ងរ)។

ជំងឺរលាកទងសួតលើកុមារនេះ មិនមានវ៉ាក់សាំងចាក់ការពារសុខភាពកូនពីជំងឺនេះនៅឡើយទេ។ ម៉្យាងវិញទៀត បើម៉ាក់ប៉ាឃើញកូនមិនស្រួលគួរយកកូនទៅពិនិត្យជាមួយគ្រូពេទ្យជំនាញឱ្យបានលឿនតាមដែលអាចធ្វើទៅតាម ហើយបើអាអូនឈឺជំងឺរលាកទងសួត គ្រូពេទ្យអាចផ្ដល់ជាថ្នាំបញ្ចុះកម្ដៅ សេរ៉ូមប្រៃ ឬថ្នាំប្រឆាំងវីរុសឱ្យអាអូនញ៉ាំ។ បន្ថែមពីនេះ យើងត្រូវផ្ដល់ទឹកឱ្យអាអូនញ៉ាំឱ្យច្រើន ចៀសវាងកូនកើតបញ្ហាខ្សោះទឹក អំឡុងពេលឈឺ។

តិចនិកបង្ការជំងឺរលាកទងសួតលើកុមារ
ម៉ាក់ប៉ាអាចជួយកាត់បន្ថយហានិភ័យជំងឺនេះ កុំឱ្យកើតឡើងលើអាអូនបានដោយអនុវត្តតាម ៥ តិចនិកខាងក្រោមនេះដូចជា៖

• លាងសម្អាតដៃម៉ាក់ៗ និងកូនឱ្យបានស្អាត និងញឹកញាប់
• ជូតសម្អាតរបស់របរកូនលេងជាប្រចាំ (ចៀសវាងអាអូនយកទៅដាក់ក្នុងមាត់ ឆ្លងមេរោគផ្ទុកលើប្រដាប់លេង)
• ឱ្យកូននៅក្នុងផ្ទះរហូតទាល់អាអូនជាសះស្បើយ សឹមឱ្យចេញលេងក្រៅ
• កុំឱ្យអ្នកឈឺផ្ដាសាយនៅក្បែរកូនតូច (ពិសេសទារកទើបកើត) និងចៀសវាងជក់បារីនៅក្បែរកូន៕

ប្រភព៖ Hellokrupet

អត្ថបទទាក់ទង

អាកាសធាតុ​ប្រែប្រួល ម៉ាក់ប៉ា​គួរដឹងវីធី​ការពារ​កូន​ពីជំងឺ​រលាកទងសួត

អាកាសធាតុប្រែប្រួល ម៉ាក់ប៉ាគួរដឹងវីធីការពារកូនពីជំងឺរលាកទងសួត