ផ្លឹស-ខេអេក ញូវ

ប៉ិច ស្រីណុច លាតត្រដាងពីដំណើរផ្សងព្រេងដ៏លំបាកនៅក្នុងផ្ទះបាយ MasterChef ទម្រាំក្លាយជាម្ចាស់ពានរង្វាន់នៅរដូវកាលទី២

MasterChef Cambodia
June 27th, 2024 (1 year)
Views: 830
Share

នៅក្នុងវគ្គផ្តាច់ព្រ័ត្រដ៏រំភើប ប៉ិច ស្រីណុច បានក្លាយជាម្ចាស់ជ័យលាភីនៃកម្មវិធីប្រកួតចម្អិនម្ហូបលំដាប់ថ្នាក់ពិភពលោក MasterChef រដូវកាលទី២ ដោយបានយកឈ្នះលើឧបសគ្គជាច្រើន និងបង្ហាញពីការអភិវឌ្ឍខ្លួនឯងក្នុងការចម្អិនម្ហូបដែលមិននឹកស្មានដល់។

ចាប់ផ្តើមក្នុងនាមជាអ្នកគាំទ្ររបស់ MasterChef និងជាចុងភៅតាមផ្ទះដែលមានចំណង់ចំណូលចិត្តក្នុងការចម្អិន ស្រីណុច បានប្ដេជ្ញាចិត្តផ្លាស់ប្តូរការស្រលាញ់ក្នុងការចម្អិនម្ហូបឱ្យក្លាយទៅជា ជំនាញវិជ្ជាជីវៈរបស់ខ្លួន។ ស្រីណុច បានតាមដានផេក Facebook ផ្លូវការរបស់ MasterChef Cambodia យ៉ាងយកចិត្តទុកដាក់ ដោយរង់ចាំឱកាសមកដល់។ នៅពេលដែលឱកាសបានមកដល់ នាងបានចំណាយថវិកាផ្ទាល់ខ្លួនចំនួន ២០ដុល្លារលើការទិញគ្រឿងផ្សំ ដើម្បីចម្អិនម្ហូបសម្រាប់ការដាក់ពាក្យ។ ថ្វីត្បិតតែធនធានមានកម្រិត ក៏ការតាំងចិត្ត និងការខិតខំប្រឹងប្រែងមួយនេះបានទទួលជោគជ័យ នៅពេលដែលស្រីណុច ត្រូវបានក្រុមការងាររបស់ CBS ជ្រើសរើសឱ្យក្លាយជាបេក្ខជនម្នាក់ ដើម្បីមកប្រកួតយកអាវអៀមស។

ដំណើរផ្សងព្រេងរបស់ស្រីណុច បានចាប់ផ្តើមជាមួយនឹងឧបសគ្គមួយ នៅពេលដែលនាងបានប្រើប្រាស់ Rosemary ខុសនៅក្នុងមុខម្ហូបគ្រឿងផ្សំគោលទា ប៉ុន្តែស្រីណុចទទួលបានឱកាសជាលើកទីពីរ។ ស្រីណុច បានប្តេជ្ញាថានឹងមិនចុះចាញ់ឡើយ ដោយបានប្រឹងប្រែងរៀនអំពីគ្រឿងផ្សំផ្សេងៗ និងកែលម្អនូវចំណុចខ្វះខាតរបស់ខ្លួន។

ក្នុងចំណោមបេក្ខជនទាំង ២៥ នាក់ ទេពកោសល្យរបស់ស្រីណុច បានលេចឡើងនៅក្នុងការប្រកួតក្នុងវិញ្ញាសាប្រអប់អាថ៌កំបាំងជាលើកដំបូង ដែលនាងទទួលបានជ័យជម្នះ។ វាបានធ្វើឱ្យស្រីណុច ទទួលបានសិទ្ធិដើម្បីដឹកនាំក្រុមពណ៌ក្រហម ទោះបីជាពួកគេត្រូវប្រឈមមុខនឹងការបរាជ័យក្នុងការប្រកួតប្រជែងជាក្រុមក៏ដោយ។ ទោះបីជាចាញ់ក៏ដោយ ក៏ស្រីណុច បានបង្ហាញភាពលេចធ្លោនៅក្នុងវិញ្ញាសាដ៏មានសម្ពាធ ដោយចម្អិន Egg Benedict ដោយជោគជ័យក្នុងរយៈពេលត្រឹមតែ ១៥ នាទីប៉ុណ្ណោះ។

ស្រីណុច មានការរីកចម្រើនជាបន្តបន្ទាប់ និងទទួលបានសមិទ្ធផលគួរឱ្យកត់សម្គាល់។ នាងបានឈ្នះការប្រកួតវិញ្ញាសាប្រអប់អាថ៌កំបាំងចំនួន ៥ ដង ដែលធ្វើឱ្យគណៈកម្មការចាប់អារម្មណ៍ជាមួយនឹងភាពច្នៃប្រឌិត និងជំនាញរបស់នាង។ ទោះបីជាប្រឈមមុខនឹងឧបសគ្គ និងការចាញ់ក្នុងវិញ្ញាសាជាក្រុមក៏ដោយ ក៏ស្រីណុច បានបង្ហាញពីភាពជាអ្នកដឹកនាំ និងភាពរឹងមាំរបស់ខ្លួន។

វិថីទៅកាន់វគ្គផ្តាច់ព្រ័ត្រមានភាពលំបាកខ្លាំង ដោយស្រីណុច បានពុះពាររាល់ឧបសគ្គឥតឈប់ឈរ។ នៅក្នុងការប្រកួតប្រជែងវគ្គផ្ដាច់ព្រ័ត្រ ស្រីណុច បានជ្រើសរើសស្ដេកជាអាហារចម្បង និង Fruit tart ជាបង្អែម ដើម្បីបង្ហាញពីភាពខ្លាំងរបស់ខ្លួនព្រោះនាងបានហាត់ធ្វើវានៅផ្ទះមិនតិចជាងដប់ដងនោះទេ។

ជ័យជម្នះរបស់ ស្រីណុច គឺជាសក្ខីភាពមួយនៃការខិតខំប្រឹងប្រែង ចំណង់ចំណូលចិត្ត និងការលះបង់ចំពោះវិស័យម្ហូបអាហារ។ រឿងរ៉ាវរបស់ស្រីណុច បានបំផុសគំនិតដល់អ្នកចម្អិនតាមផ្ទះថា មានការតាំងចិត្ត និងការតស៊ូ អ្នកនឹងអាចសម្រេចក្តីស្រមៃរបស់ខ្លួនបាន។

ក្នុងនាមជាម្ចាស់ពានរង្វាន់ MasterChef Cambodia រដូវកាលទី២ ប៉ិច ស្រីណុច បានចូលរួមលើកស្ទូយវិស័យម្ហូបអាហារនៅក្នុងប្រទេសកម្ពុជា។ រឿងរ៉ាវរបស់នាងពីចុងភៅតាមផ្ទះក្លាយជាចុងភៅដ៏ល្បីម្នាក់ បានឆ្លុះបញ្ចាំងពីតម្លៃដ៏អស្ចារ្យនៃកម្មវិធី MasterChef Cambodia និងភាពជោគជ័យនៃការដើរតាមក្ដីស្របិនរបស់ខ្លួនពីមនុស្សម្នាក់៕

អត្ថបទទាក់ទង