ផ្លឹស-ខេអេក ញូវ

នាយកដ្ឋានប្រឆាំងបទល្មើសបច្ចេកវិទ្យាកម្ពុជា បង្ហាញករណីឆបោកនៅសិង្ហបុរី ដែលប៉ះពាល់អតិថិជនជិត៥០០នាក់ និងបាត់បង់ជាង៦លានដុល្លារ

សង្គម
January 21st, 2022 (3 years)
Views: 204
Share

ភ្នំពេញ៖ នាយកដ្ឋានប្រឆាំងបទល្មើសបច្ចេកវិទ្យាកម្ពុជា បានឱ្យដឹងថា បើតាមការផ្សព្វផ្សាយរបស់សារព័ត៌មាន the Straits Times កាលពីពេលថ្មីៗនេះ អាជ្ញាធរប្រទេសសិង្ហបុរី កំពុងពិចារណាលើវិធានការត្រួតពិនិត្យទៅលើធនាគារដ៏ធំមួយដែលអាចចាត់ទុកជាធនាគារធំទីពីរ នៅក្នុងតំបន់អាស៊ីអាគ្នេយ៍ បន្ទាប់ពីធនាគារនេះ ត្រូវបានរងការរិះគន់ថា មិនបានចាត់វិធានការឱ្យបានទាន់ពេលវេលា ទាក់ទងនឹងការបោកបញ្ឆោតតាមរយៈការផ្ញើសារ កាលពីចុងឆ្នាំ២០២១។

ការបោកបញ្ឆោតជាលើកដំបូង បានកើតឡើងនៅដើមខែធ្នូ ឆ្នាំ២០២១ ហើយកាន់តែរីករាលដាលខ្លាំងក្នុងអំឡុងពេលថ្ងៃឈប់សម្រាក។ នៅចុងខែធ្នូ អាជ្ញាធរបានរាយការណ៍ថា ការឆបោកបានប៉ះពាល់ដល់អតិថិជនចំនួន ៤៦៩នាក់ និងបាត់បង់ថវិកាជាង ៦,៣លានដុល្លារសហរដ្ឋអាមេរិក។

នៅក្នុងការបោកបញ្ឆោតនេះ ជនរងគ្រោះ ទទួលបានសារ SMS ដែលហាក់ដូចជាមកពីធនាគារ ដែលមិនមានការស្នើសុំ ហើយសូមឱ្យម្ចាស់គណនីចុចលើតំណភ្ជាប់ដើម្បីដោះស្រាយបញ្ហាមួយចំនួនទាក់ទងនឹងគណនី។ នៅពេលដែលតំណភ្ជាប់នោះត្រូវបានចុច ជនរងគ្រោះ ត្រូវបានបញ្ជូនបន្តទៅកាន់គេហទំព័រធនាគារក្លែងក្លាយ ដែលពួកគេផ្តល់ព័ត៌មានលម្អិតអំពីការចូលគណនីរបស់ពួកគេ។ ជនរងគ្រោះមិនបានដឹងថា ពួកគេត្រូវបានគេបោកនោះទេ រហូត ដល់ ពួកគេ ទទួល បាន ការ ជូន ដំណឹង អំពី ប្រតិបត្តិការ ផ្ទេរលុយចេញពីគណនីដោយគ្មាន ការ អនុញ្ញាត ។ កាលពីថ្ងៃទី១៩ ខែមករា ធនាគារបានប្រកាសថា អតិថិជនដែលបានរងគ្រោះទាក់ទងនឹងការបោកបញ្ឆោតនេះ នឹងទទួលបានប្រាក់ដែលបានបាត់បង់ទាំងអស់មកវិញ។

ដោយមើលឃើញពីហានិភ័យក្នុងការប្រើប្រាស់ឧបករណ៍បច្ចេកវិទ្យាក្នុងការធ្វើប្រតិបត្តិការអនឡាញ ទើបនាយកដ្ឋានប្រឆាំងបទល្មើសបច្ចេកវិទ្យាកម្ពុជា តែងតែធ្វើការណែនាំឱ្យអ្នកប្រើប្រាស់មានការប្រុងប្រយ័ត្ននៅពេលដែលទទួលបានសារទាក់ទងទៅនឹងបញ្ហាជាមួយគណនីធនាគារ ឬសារដែលទាមទារឱ្យលោកអ្នកផ្ដល់នូវលេខកូដសម្ងាត់ OTP។

ប្រសិនបើលោកអ្នកទទួលបានសារទាំងនោះ លោកអ្នកគួរតែធ្វើការទំនាក់ទំនងតាមរយៈទូរសព្ទរបស់ធនាគារផ្ទាល់ ជាងនេះទៅទៀត សូមលោកអ្នកកុំចុចនៅលើតំណភ្ជាប់ដែលមាននៅក្នុងសារ ឬអ៊ីមែល៕

អត្ថបទទាក់ទង