×

រដ្ឋធានីញូវដែលីរបស់ឥណ្ឌាបង្កេីតធនាគារម៉ាស៊ីនបន្សុទ្ធអុកស៊ីសែនដេីម្បីព្យាបាលអ្នកជំងឺកូវីដ-១៩ នៅតាមផ្ទះ

សាច់រឿង៖អាជ្ញាធរក្នុងរដ្ឋធានីញូវដែលីរបស់ប្រទេសឥណ្ឌា កាលពីថ្ងៃចុងសប្ដាហ៍ បានប្រកាសពីការបង្កើតធនាគារម៉ាស៊ីនបន្សុទ្ធអុកស៊ីសែននៅតាមសង្កាត់នីមួយៗដើម្បីធានាការផ្គត់ផ្គង់អុកស៊ីសែនដល់អ្នកជំងឺកូវីដ-១៩ ដែលកំពុងស្ថិតនៅក្រោមវិធានការចត្តាឡីស័កនៅតាមផ្ទះទូទាំងទីក្រុងនេះ។

បច្ចុប្បន្ននេះ ឥណ្ឌាកំពុងប្រយុទ្ធតស៊ូនឹងរលកឆ្លងវីរុសកូវីដ-១៩ លេីកទី២ដ៏អាក្រក់បំផុត ដោយករណីឆ្លងថ្មីប្រចាំថ្ងៃមានចំនួនលើសពី ៣០ម៉ឺននាក់អស់រយៈពេល ២៤ថ្ងៃជាប់គ្នាមកហេីយ។

បេីទោះបីជា ករណីឆ្លងថ្មីនៅក្នុងរដ្ឋធានីញូវដែលីបានថយចុះមកនៅប្រហែល ៨.៥០០នាក់ក្នុងមួយថ្ងៃក៏ដោយ ក៏រដ្ឋធានីនេះនៅតែជាតំបន់មួយក្នុងចំណោមតំបន់ដែលរងគ្រោះខ្លាំងជាងគេនៅក្នុងប្រទេសដោយមានករណីឆ្លងសរុបជាង ៧០.០០០នាក់។

ដើម្បីបន្ធូរបន្ថយសម្ពាធលើមន្ទីរពេទ្យ អ្នកជំងឺជាច្រើនដែលស្ថានភាពរបស់ពួកគេបានធូរស្បើយបន្ទាប់ពីបានចូលសម្រាកព្យាបាលនៅមន្ទីរពេទ្យ ឬអ្នកដែលកំពុងមានរោគសញ្ញាកម្រិតស្រាល និងមធ្យមនោះ ត្រូវបានដាក់ឲ្យធ្វេីចត្តាឡីស័កនៅផ្ទះ។ ប៉ុន្តែអ្នកជំងឺជាច្រើននៅតែត្រូវការការព្យាបាល ដូច្នេះហេីយធនាគារម៉ាស៊ីនបន្សុទ្ធអុកស៊ីសែនត្រូវបានបង្កើតឡើងនៅទូទាំងរដ្ឋធានីញូវដែលីដើម្បីបំពេញតម្រូវការរបស់ពួកគេ។

អង្គការ និងក្រុមសហគមន៍មួយចំនួនបានចូលរួមផ្គត់ផ្គង់ និងចែកចាយអុកស៊ីសែនក៏ដូចជាសម្ភារៈផ្គត់ផ្គង់ផ្នែកវេជ្ជសាស្ត្រ និងស្បៀងអាហារផ្សេងៗទៀតផងដែរនៅពេលដែលការខ្វះខាតត្រូវបានរាយការណ៍។

យោងតាមទិន្នន័យពីក្រសួងសុខាភិបាល ចំនួនសរុបនៃអ្នកឆ្លងវីរុសកូវីដ-១៩ នៅក្នុងប្រទេសឥណ្ឌាបានកើនឡើងដល់ជាង ២៤លាន៦៨ម៉ឺននាក់ ក្នុងនោះមានអ្នកស្លាប់ជាង ២៧ម៉ឺននាក់។

ក្នុងរយៈពេល ២៤ម៉ោងកន្លងមក ករណីឆ្លងថ្មីជាង ៣១ម៉ឺននាក់ និងអ្នកស្លាប់ថ្មីជាង ៤ពាន់នាក់ត្រូវបានរាយការណ៍នៅទូទាំងប្រទេសឥណ្ឌា៕

អ្នកអាចចែករំលែកដោយ៖

អត្ថបទទាក់ទង
turkce.yurtdisi-fx.comagario paper.io 2 agarioTürkiye’den İngiltere’ye eşya taşıma gebze evden eve nakliyat
zonguldak son dakika