ផ្លឹស-ខេអេក ញូវ

ក្រសួង ជំរុញឱ្យនាំចេញផ្លែមៀនទៅប្រទេសវៀតណាម និងស្នើឱ្យពលរដ្ឋខ្មែរជួយទិញមៀនខ្មែរ

សង្គម
August 13th, 2021 (3 years)
Views: 324
Share

ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១២ ខែសីហា ឆ្នាំ២០២១ បានចេញសេចក្ដីប្រកាសមួយ ក្នុងគោលបំណងដើម្បីចូលរួមចំណែកដោះស្រាយបញ្ហាទីផ្សារផលិតផលមៀនប៉ៃលិន ដែលកំពុងប្រឈមនឹងបញ្ហានានា បង្កឡើងដោយការឆ្លងរាតត្បាតនៃជំងឺកូវីដ១៩។

ក្រសួងកសិកម្ម រុក្ខាប្រមាញ់ និងនេសាទ បានធ្វើការណែនាំដល់ក្រុមហ៊ុននាំចេញ គួរបង្វែរទិសដៅពីប្រទេសថៃទៅប្រទេសវៀតណាមវិញ ពីព្រោះកម្ពុជាបានបើកទីផ្សារសម្រាប់ ផ្លែមៀននេះរួចហើយ តាមរយៈការសម្រេចបាននូវការឯកភាពគ្នាលើលក្ខខណ្ឌតម្រូវនានារួចហើយសម្រាប់នាំចេញផ្លែមៀនកម្ពុជាទៅកាន់ប្រទេសវៀតណាម។

ទន្ទឹមនេះ ក្រសួងបានអំពាវនាវដល់បងប្អូនប្រជាពលរដ្ឋគួររួមគ្នាគាំទ្រផលិតផលខ្មែរ ក្រោមរូបភាព ខ្មែរជួយខ្មែរ ដោយជួយទិញផ្លែមៀនរបស់ប្រជាកសិករយើង ពិសេសសហគមន៍កសិកម្មមៀនប៉ៃលិន នៅក្នុងកាលៈទេសៈដ៏លំបាកនេះ។ ម្ចាស់ទីតាំងផ្សារទំនើប ក្រុមហ៊ុន ឬសិប្បកម្មកែច្នៃកសិផលក្នុងស្រុក គួរនាំគ្នាជួយប្រមូលទិញផ្លែមៀនប៉ៃលិន មកលក់ចែកចាយ ឬធ្វើការកែច្នៃសម្រាប់បម្រើដល់ការហូបចុកក្នុងស្រុកជំនួសឱ្យការនាំចូលនូវផ្លែមៀនកំប៉ុង ពីក្រៅប្រទេសវិញ។

សូមជម្រាបថា បញ្ហារីករាលដាលនៃជំងឺកូវីដ១៩ និងរបាំងភូតគាមអនាម័យ ជាកត្តាធ្វើឱ្យមានបញ្ហាប្រឈមមិនទាន់អាចធ្វើការនាំចេញទៅកាន់ទីផ្សារក្រៅប្រទេសបាន ពិសេសប្រទេសថៃ កំពុងបិទមិនឱ្យនាំចូលមៀនប៉ៃលិនតាមច្រកព្រំដែនឡើយ៕

អត្ថបទទាក់ទង

ក្រសួង ជំរុញឱ្យ​នាំចេញ​ផ្លែមៀន​ទៅប្រទេស​វៀតណាម និង​ស្នើឱ្យ​ពលរដ្ឋខ្មែរ​ជួយ​ទិញមៀនខ្មែរ

ក្រសួង ជំរុញឱ្យនាំចេញផ្លែមៀនទៅប្រទេសវៀតណាម និងស្នើឱ្យពលរដ្ឋខ្មែរជួយទិញមៀនខ្មែរ