×
ព័ត៌មានថ្មី

នាវាដឹកទំនិញ ជួប​ឧបទ្ទវហេតុ​បណ្ដាល​ឱ្យដាច់ខ្លួន​ជាពីរកំណាត់ នៅ​កំពង់ផែ​ប្រទេសជប៉ុន

ជប៉ុន៖ ឆ្មាំសមុទ្ររបស់ប្រទេសជប៉ុន បានឱ្យដឹងថា នាវាដឹកទំនិញមួយគ្រឿង បានដាច់ខ្លួនជាពីរកំណាត់ បន្ទាប់ពីវាបានបុកនឹងបាតសមុទ្រដែលមានជម្រៅរាក់ នៅកំពង់ផែមួយ ភាគខាងជើងប្រទេសនេះ និងបានបង្កការហូរប្រេងចូលសមុទ្រ។

ក្រុមហ៊ុនដែលគ្រប់គ្រងនាវាដឹកទំនិញខាងលើ មានឈ្មោះ NYK Line បានថ្លែងថា សមាជិកនាវិកចិន និងហ្វីលីពីនទាំង ២១ នាក់ត្រូវបានជួយសង្គ្រោះដោយសុវត្ថិភាព ដោយឆ្មាំសមុទ្រជប៉ុន។

នាវាដឹកឈើបន្ទះឈើ ទម្ងន់ ៣៦.២០០ តោន ឈ្មោះ Crimson Polaris បានចូលចត កាលពីថ្ងៃពុធកន្លងទៅ ខណៈកំពុងធ្វើដំណើរទៅកាន់កំពង់ផែ Hachinohe ។
ឆ្មាំសមុទ្រ បាននិយាយថា នាវាអាចរំដោះខ្លួនចេញពីបាតសមុទ្រដែលមានជម្រៅរាក់បាន ប៉ុន្តែបានទទួលរងនូវការប្រេះស្រាំ ដែលបានបណ្តាលឱ្យនាវាដាច់ជាពីរ នៅព្រឹកថ្ងៃព្រហស្បតិ៍ ទី១២ ខែសីហា ឆ្នាំ២០២១នេះ។

ក្រុមហ៊ុន NYK Line បាននិយាយនៅក្នុងសេចក្តីថ្លែងការណ៍មួយថា បរិមាណនៃការលេចធ្លាយប្រេង កំពុងស្ថិតនៅក្រោមការស៊ើបអង្កេត។

នាវាដែលត្រូវបានចុះបញ្ជីនៅប្រទេសប៉ាណាម៉ា បានរសាត់ប្រហែល ៤ គីឡូម៉ែត្រពីកំពង់ផែ។ ចំណែកទំហំនៃប្រេងដែលធ្លាយចេញពីនាវា ត្រូវបានរាយការណ៍ថា មានប្រវែង ៥,១ គីឡូម៉ែត្រ និងទទឹងប្រហែល ១ គីឡូម៉ែត្រ៕

(ទស្សនាវីដេអូ)

អ្នកអាចចែករំលែកដោយ៖

អត្ថបទទាក់ទង