ផ្លឹស-ខេអេក ញូវ

ប្រធានមន្ទីរទេសចរណ៍ខេត្តមួយចំនួន ថា ភ្ញៀវទេសចរដែលចាក់វ៉ាក់សាំងពេញលេញ ទទួលបានការបញ្ចុះតម្លៃរហូតដល់១០%

សង្គម
September 23rd, 2021 (4 years)
Views: 366
Share

ភ្នំពេញ៖ ប្រធានមន្ទីរទេសចរណ៍ខេត្តមួយចំនួន បានឱ្យដឹងថា ចំពោះអ្នកដែលបានចាក់វ៉ាក់សាំងហើយ គឺមានការលើកទឹកចិត្តបន្ថែមតាមរយៈការបញ្ចុះតម្លៃ ៥% ឬ ១០% ជាដើម នៅពេលភ្ញៀវទេសចរចូលទទួលទានអាហារ ឬស្នាក់នៅតំបន់ទេសចរណ៍នានា។

អ្នកដែលគ្មានបណ្ណចាក់វ៉ាក់សាំង តម្រូវឱ្យធ្វើតេស្តរហ័ស ប៉ុន្តែប្រសិនបើមិនព្រមធ្វើតេស្តរហ័សនេះទេ គឺមិនឱ្យចូលទទួលទានអាហារ ឬស្នាក់នៅនោះឡើយ។

ការអះអាងចេញពីមន្ទីរទេសចរណ៍ខេត្តយ៉ាងដូច្នេះ ត្រូវបានធ្វើឡើងក្នុងកិច្ចប្រជុំស្ដាប់របាយការណ៍ពីគ្រប់មន្ទីរទេសចរណ៍រាជធានី-ខេត្ត តាមរយៈប្រព័ន្ធវីដេអូ Zoom Meeting នាថ្ងៃទី២២ ខែកញ្ញា ឆ្នាំ២០២១ នៅទីស្ដីការក្រសួងទេសចរណ៍។

លោក ថោង ខុន រដ្ឋមន្ត្រីក្រសួងទេសចរណ៍ ក៏ដូចជាប្រធានមន្ទីរទេសចរណ៍គ្រប់រាជធានី-ខេត្តទាំង ២៥ បានអះអាងថា អ្នកបម្រើការនៅតាមវិស័យទេសចរណ៍នៅទូទាំងប្រទេស ទទួលបានការចាក់វ៉ាក់សាំងបង្ការមេរោគកូវីដ១៩ ស្ទើរតែទាំងអស់ហើយ។

លោករដ្ឋមន្ត្រីបន្តថា អ្នកដែលបានចាក់វ៉ាក់សាំង គ្រប់ដូសគ្រប់គ្រាន់ ទើបអាចអនុញ្ញាតឱ្យចូលបម្រើការបាន។
លោករដ្ឋមន្ត្រីបានមានប្រសាសន៍បែបនេះថា៖ “ម្ចាស់មូលដ្ឋានអាជីវកម្មសេវាកម្មទេសចរណ៍ អ្នកបម្រើការក្នុងវិស័យទេសចរណ៍ បានចាក់វ៉ាក់សាំងគ្រប់គ្នាអស់ហើយ យ៉ាងតិចក៏២ដូសដែរ ពិសេសប្រជាពលរដ្ឋនៅគ្រប់រាជធានី-ខេត្តគឺចាក់សុទ្ធតែ២ដូសហើយ ចាប់ពី ៩០% ដល់ ១០០% មានតែ ៣-៤ នាក់ប៉ុណ្ណោះ ដោយសារថាពួកគាត់មានបញ្ហាសុខភាព មន្ទីរទេសចរណ៍ទាំងអស់បានរាយការណ៍មកបែបហ្នឹង”។

ក្រសួងទេសចរណ៍ និងមន្ទីរទេសចរណ៍ក៏បានជំរុញឱ្យប្រតិបត្តិករទេសចរណ៍ អ្នកបម្រើការនៅតាមគោលដៅទេសចរណ៍ទាំងអស់ ចូលរួមចាក់វ៉ាក់សាំងឱ្យបានគ្រប់ៗគ្នា ដើម្បីគាំទ្រដល់ផែនការជំរុញការបើកទេសចរណ៍ផ្ទៃក្នុង ក៏ដូចជាផែនការត្រៀមបើកទទួលទេសចរអន្តរជាតិឡើងវិញនាពេលខាងមុខ៕

អត្ថបទទាក់ទង