ផ្លឹស-ខេអេក ញូវ

ពលរដ្ឋសិង្ហបុរី ដែលមិនបានចាក់វ៉ាក់សាំង ត្រូវបានហាមឃាត់មិនឱ្យទៅផ្សារទំនើប អាហារដ្ឋាន ហាងកាហ្វេ ចាប់ពីថ្ងៃនេះតទៅ

សង្គម
October 13th, 2021 (3 years)
Views: 323
Share

សិង្ហបុរី៖ ជនជាតិសិង្ហបុរីដែលមិនបានទៅចាក់វ៉ាក់សាំងការពារជំងឺកូវីដ១៩ នឹងមិនត្រូវបានអនុញ្ញាតឱ្យចូលផ្សារទំនើប ឬទទួលទានអាហារនៅមជ្ឈមណ្ឌលលក់ដូរ និងហាងកាហ្វេ ចាប់ពីថ្ងៃទី១៣ ខែតុលា ឆ្នាំ២០២១នេះតទៅ។

ការលើកលែងត្រូវបានផ្តល់ជូនដល់តែអ្នកដែលកំពុងស្វែងរកសេវាថែទាំសុខភាព និងកុមារអាយុក្រោម ១២ឆ្នាំ ឬបុគ្គលដែលមិនបានចាក់វ៉ាក់សាំងដែលបានជាសះស្បើយពីកូវីដ១៩ប៉ុណ្ណោះ។ ចាប់ពីថ្ងៃទី ២០ ខែតុលា អ្នកល្មើសនឹងបទបញ្ជានេះ ប្រឈមនឹងការផាកពិន័យ។

មនុស្សជិត ៦.០០០ នាក់ត្រូវបានគេរាយការណ៍ថា បានចុះហត្ថលេខាលើញត្តិ តាមអ៊ីនធឺណិតទៅកាន់វេបសាយ Change.org ទាមទារឱ្យរដ្ឋាភិបាលសិង្ហបុរី លុបចោលការរឹតត្បិត ដែលពួកគេបាននិយាយថា ពួកគេត្រូវបានគេបដិសេធ ការចូលទិញទំនិញ និងការទទួលសេវាកម្មសំខាន់ៗ។

សិង្ហបុរី បានចាក់ថ្នាំបង្ការកូវីដ១៩ជាង ៨០% នៃប្រជាជនរបស់ខ្លួន ប៉ុន្តែប្រទេសនេះ បានប្រឈមនឹងរលកនៃការឆ្លងមេរោគកូវីដ១៩ ដ៏អាក្រក់បំផុតក្នុងរយៈពេលប៉ុន្មានសប្តាហ៍ចុងក្រោយនេះ បន្ទាប់ពីវិធានការសុខាភិបាល ត្រូវបានបន្ធូរបន្ថយ ខណៈដែលមន្ទីរពេទ្យក្នុងស្រុក បាននិងកំពុងជួបនូវកំណើននៃអ្នកជំងឺកូវីដ១៩បន្ថែមទៀត។

ភាគច្រើននៃអ្នកដែលឆ្លងថ្មីនេះ មានរោគសញ្ញាស្រាលប៉ុណ្ណោះ ខណៈដែលចំនួនអ្នកជំងឺដែលកំពុងស្ថិតក្នុងស្ថានភាពធ្ងន់ធ្ងរ ឬនៅលើបំពង់អុកស៊ីសែន ភាគច្រើនជាមនុស្សចាស់។ ការស្លាប់ថ្មីមួយជារៀងរាល់ថ្ងៃ ភាគច្រើនជាមនុស្សចាស់ ដែលភាគច្រើនមិនបានចាក់វ៉ាក់សាំងការពារ។

គិតត្រឹមថ្ងៃទី១២ ខែតុលា ប្រទេសសិង្ហបុរី រកឃើញករណីឆ្លងកូវីដ១៩សរុប ១៣២.២០៥ នាក់ ក្នុងនោះស្លាប់ ១៨៣នាក់ និងអ្នកជំងឺជាសះស្បើយ ១០៤.៨៥៦ នាក់៕

អត្ថបទទាក់ទង