ផ្លឹស-ខេអេក ញូវ

ទីក្រុងហូជីមិញ នឹងបើកទទួលភ្ញៀវទេសចរអន្តរជាតិឡើងវិញ នៅដើមឆ្នាំ២០២២

សង្គម
October 20th, 2021 (3 years)
Views: 313
Share

វៀតណាម៖ ទីក្រុងហូជីមិញ នឹងចាប់ផ្តើមទទួលភ្ញៀវទេសចរអន្តរជាតិឡើងវិញ នៅដើមឆ្នាំ២០២២ បន្ទាប់ពីអាជ្ញាធរទីក្រុងភាគខាងត្បូងប្រទេសវៀតណាមនេះ ដាក់គោលដៅបើកដំណើរការទេសចរណ៍ឡើងវិញចំនួន៣ដំណាក់កាល។

ផែនការនេះ ត្រូវបានដាក់ឱ្យដំណើរការនៅពេលដែលប្រទេសវៀតណាម កំពុងបន្ធូរបន្ថយការរឹតត្បិត ដើម្បីបន្តសកម្មភាពសេដ្ឋកិច្ចសង្គម ក្រោមការរស់នៅក្នុងបរិបទថ្មី។

ការងើបឡើងវិញនៃវិស័យទេសចរណ៍ នឹងអនុវត្តតាមផែនទីបង្ហាញផ្លូវ ៣ដំណាក់កាល ដែលតម្រូវឱ្យមានការអនុលោមតាមយ៉ាងតឹងរ៉ឹងជាមួយវិធានការបង្ការការរីករាលដាលនៃជំងឺកូវីដ១៩។

ក្នុងដំណាក់កាលទី១ ដែលមានរយៈពេលចាប់ពីពេលនេះរហូតដល់ថ្ងៃទី៣១ ខែតុលា ទីក្រុងនឹងបើកដំណើរការសកម្មភាពទេសចរណ៍ក្នុងស្រុកឡើងវិញ នៅក្នុងតំបន់ពណ៌បៃតង ដែលគ្មានករណីឆ្លងជំងឺកូវីដ១៩។

ដំណាក់កាលទី២ នឹងចាប់ផ្តើមពីថ្ងៃទី១ ខែវិច្ឆិកាដល់ចុងឆ្នាំនេះ ក្នុងកំឡុងពេលដែលទេសចរណ៍អន្តរជាតិ នឹងត្រូវបានអនុញ្ញាតជាពិសេសសម្រាប់តំបន់បៃតង។

នៅដំណាក់កាលទី៣ និងចុងក្រោយដែលនឹងចាប់ផ្តើមពីថ្ងៃទី១ ខែមករា ឆ្នាំ២០២២ ប្រតិបត្តិការទេសចរណ៍អន្តរជាតិ នឹងត្រូវចាប់ផ្តើមឡើងវិញរួមជាមួយដំណើរកម្សាន្តក្នុងស្រុក ដោយផ្អែកលើលទ្ធផលគ្រប់គ្រងការរីករាលដាលនៃជំងឺកូវីដ១៩នៅក្នុង និងក្រៅប្រទេស។

នៅដំណាក់កាលនេះ ផលិតផលទេសចរណ៍ទាំងអស់ ត្រូវបានគេរំពឹងថានឹងដំណើរការឡើងវិញដោយគ្មានដែនកំណត់ ដោយតម្រូវឱ្យប្រតិបត្តិករ ធានានូវគោលការណ៍នៃការរស់នៅប្រកបដោយសុវត្ថិភាពជាមួយមេរោគកូវីដ១៩៕

អត្ថបទទាក់ទង

ទីក្រុងហូជីមិញ នឹង​បើក​ទទួល​ភ្ញៀវទេសចរ​អន្តរជាតិ​ឡើងវិញ នៅដើមឆ្នាំ២០២២

ទីក្រុងហូជីមិញ នឹងបើកទទួលភ្ញៀវទេសចរអន្តរជាតិឡើងវិញ នៅដើមឆ្នាំ២០២២