ផ្លឹស-ខេអេក ញូវ

ក្រសួងអនុញ្ញាតឱ្យអ្នកដំណើរចាក់វ៉ាក់សាំងពេញលេញ មិនមានវិជ្ជមានកូវីដ១៩ ចេញពីការធ្វើចត្តាឡីស័ក នៅថ្ងៃទី១៥វិច្ឆិកានេះ

សង្គម
November 15th, 2021 (2 years)
77
Share

ភ្នំពេញ៖ អ្នកដំណើរ ដែលបានចាក់វ៉ាក់សាំងកូវីដ១៩ពេញលេញ ហើយកំពុងធ្វើចត្តាឡីស័កនៅតាមមណ្ឌល ចត្តាឡីស័ក, សណ្ឋាគារ និង គេហដ្ឋាន នៅទូទាំងប្រទេស និងដែលមិនមានវិជ្ជមានកូវីដ១៩ ត្រូវអនុញ្ញាតឱ្យចេញពីការធ្វើចត្តាឡីស័ក ចាប់ពីថ្ងៃ១៥ ខែវិច្ឆិកា ឆ្នាំ២០២១ នេះតទៅ។ នេះបើយោងតាមសេចក្តីជូនដំណឹង ស្តីពីការអនុញ្ញាតឱ្យអ្នកដំណើរដែលបានចាក់វ៉ាក់សាំងកូវីដ១៩ ពេញលេញ ចូលមកកម្ពុជាដោយមិនតម្រូវឱ្យធ្វើចត្តាឡីស័ករបស់ក្រសួងសុខាភិបាល។

សេចក្ដីជូនដំណឹងនេះបានឱ្យដឹងទៀតថា អ្នកដំណើរដែលបានចាក់វ៉ាក់សាំងកូវីដ១៩ ពេញលេញ ហើយចូលមកកម្ពុជា តាមផ្លូវអាកាស, ផ្លូវទឹក និង ផ្លូវគោក ត្រូវភ្ជាប់មកជាមួយនូវបណ្ណ ឬ វិញ្ញាបនបត្រចាក់វ៉ាក់សាំងកូវីដ១៩ ដែលបញ្ជាក់ពីការចាក់វ៉ាក់សាំងកូវីដ១៩ ដូសមូលដ្ឋានពេញលេញ និង វិញ្ញាបនបត្របញ្ជាក់ថាគ្មានជំងឺកូវីដ១៩ (តេស្ត PCR) ដែលមានសុពលភាពរយៈពេល ៧២ម៉ោង មុនពេលមកដល់កម្ពុជា ដែលទទួលស្គាល់ដោយអាជ្ញាធរសុខាភិបាលនៃប្រទេសសាមី។ ពេលមកដល់កម្ពុជា, សាមីអ្នកដំណើរត្រូវធ្វើតេស្តរហ័ស (Rapid Test) កូវីដ១៩ នៅច្រកចូលប្រទេស ហើយត្រូវរង់ចាំលទ្ធផលតស្ករហ័ស រយៈពេលពី ១៥ ទៅ ២០ នាទី ។ បន្ទាប់ពីទទួលបានលទ្ធផលតេស្តកូវីដ១៩ អវិជ្ជមាន បុគ្គលនោះអាចធ្វើដំណើរបាន ដោយសេរី នៅទូទាំងកម្ពុជា ដោយមិនកម្រិតតំបន់ ឬ ខេត្ត ក្រុងនោះទេ និង មិនតម្រូវឱ្យធ្វើចត្តាឡីស័កឡើយ។

ដោយឡែក សម្រាប់អ្នកដំណើរដែលមិនទាន់បានចាក់វ៉ាក់សាំងកូវីដ១៩ ហើយធ្វើដំណើរចូលមកកម្ពុជា គឺតម្រូវឱ្យឆ្លងកាត់ការធ្វើតេស្តកូវីដ១៩ ដោយម៉ាស៊ីន PCR និង ធ្វើចត្តាឡីស័ក រយៈពេល ១៤ថ្ងៃ ស្របទៅតាមនីតិវិធីជាធរមាន៕

អត្ថបទទាក់ទង