×

ផ្លូវរត់​អត្តពលកម្ម អាងហែលទឹក និង​អគារ​លំហាត់ប្រាណ ត្រូវបាន​ប្រគល់​ជូន​ដល់​វិទ្យាស្ថានជាតិ​អប់រំកាយ និង​កីឡា

យោងតាមគណៈកម្មាធិការជាតិរៀបចំការប្រកួតកីឡាស៊ីហ្គេមកម្ពុជាឆ្នាំ២០២៣ បានឱ្យដឹងថា លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក MIKAMI Masahiro ឯកអគ្គរាជទូតជប៉ុនប្រចាំកម្ពុជា បានអញ្ជើញប្រគល់-ទទួលផ្លូវរត់អត្តពលកម្ម ៨ខ្សែបន្ទាត់ អាងហែលទឹក និងអគារធ្វើលំហាត់ប្រាណ ដោយមានបំពាក់សម្ភារបរិក្ខារពីរដ្ឋាភិបាល-ប្រជាជនជប៉ុន ជូនដល់វិទ្យាស្ថានជាតិអប់រំកាយ និងកីឡា កាលពីព្រឹកថ្ងៃទី៨ ខែធ្នូ ឆ្នាំ២០២១។

លោកស្រី ហ៊ូ សិទ្ធិសោភាល័យ នាយិកាវិទ្យាស្ថានជាតិអប់រំកាយ និងកីឡា បញ្ជាក់ថា គម្រោង “អភិវឌ្ឍវិទ្យាស្ថានជាតិអប់រំកាយ និងកីឡា ជាគ្រឹះស្ថានឧត្តមសិក្សា” ត្រូវបានអនុវត្ត ក្រោមកិច្ចសហប្រតិបត្តិការ រវាងវិទ្យាស្ថានជាតិអប់រំកាយ និងកីឡា និងអង្គការក្រៅរដ្ឋាភិបាលបេះដូងមាស ក្រោមជំនួយឥតសំណងនៃរាជរដ្ឋាភិបាលជប៉ុន។ គម្រោងនេះ បានចាប់ផ្តើមដំណើរការចាប់តាំងពីខែមករា ឆ្នាំ២០១៩ ដែលមានរយៈពេល៣ឆ្នាំ។

លោកស្រីបន្ថែមថា ផ្លូវរត់អត្តពលកម្ម តាមរយៈជំនួយឥតសំណង គូសាណូណិ មានតម្លៃសរុបចំនួន ៩០.៦៤០ ដុល្លារអាមេរិក។ អាងហែលទឹក និងអគារធ្វើលំហាត់ប្រាណ ដោយបំពាក់សម្ភារបរិក្ខារ ជាមួយនិងសម្ភារកីឡាមួយចំនួនដូចជា៖ ក្តារស្នោហែលទឹក កម្រាលយ៉ូហ្គា balance ball បាល់ទាត់ បាល់ទះ បាល់បោះ គ្រាប់ប៊ូល តុវាយកូនឃ្លីលើតុ និងថវិកាសម្រាប់ធ្វើឧបករណ៍រក្សាទុកខ្សែបន្ទាត់អាងហែលទឹក ដែលជាជំនួយឥតសំណង សម្របសម្រួលដោយអង្គការក្រៅរដ្ឋាភិបាលបេះដូងមាស ចាប់តាំងពីឆ្នាំ២០១៩ និងឆ្នាំ២០២១ ដែលមានតម្លៃសរុបចំនួន ៧២១.៥០៥,៨៦ ដុល្លារអាមេរិក។ ស្បែកជើងកីឡាសម្រាប់គរុនិស្សិតថ្នាក់បរិញ្ញាបត្រចំនួន ៧០គូ ជាអំណោយរបស់ Fujisawa Minami Rotary Club ក្រោមការសម្របសម្រួលដោយអង្គការក្រៅរដ្ឋាភិបាលបេះដូងមាស។

លោក MIKAMI Masahiro បានលើកឡើងថា សមិទ្ធផលហេដ្ឋារចនាសម័ន្ធកីឡាទាំងអស់នេះ វានឹងជួយឱ្យវិទ្យាស្ថានជាតិអប់រំកាយ និងកីឡា មានគុណភាពខ្ពស់ ក្នុងបរិយាកាសសមស្រប ដើម្បីរួមចំណែកយ៉ាងសំខាន់ ក្នុងការផ្តល់ឲ្យនិស្សិតកម្រិតថ្នាក់អប់រំកាយ និងកីឡា ប្រកបដោយគុណភាព ទៅចែករំលែកនៅតាមបណ្តាសាលារៀននានា នៅក្នុងប្រទេស នៅពេលពួកគេបានបញ្ចប់ការសិក្សា។ លោកឯកអគ្គរាជទូត បានបញ្ជាក់ទៀតថា ថ្នាក់អប់រំកាយ មិនត្រឹមតែផ្តល់ឲ្យសិស្ស នូវភាពសកម្មផ្នែករាងកាយប៉ុណ្ណោះទេ ប៉ុន្តែវាក៏បានបង្រៀនពីសារសំខាន់ នៃការងារជាក្រុម ការអនុវត្តតាមបទបញ្ញត្តិ និងស្មារតី នៃការលេងដោយយុត្តិធម៌តាមរយៈសកម្មភាពជាក្រុម។ បទពិសោធដែលទទួលបានតាមរយៈការយល់ដឹង និងការរៀនសូត្រជាមួយមិត្តរួមថ្នាក់ នឹងក្លាយជាទ្រព្យសម្រាប់ជីវិត។ លោកសង្ឈឹមជឿជាក់ថា សមិទ្ធផលទាំងអស់នេះ នឹងត្រូវបានប្រើប្រាស់យូរអង្វែង និងជានិមិត្តរូបរវាងប្រទេសជប៉ុន និងប្រទេសកម្ពុជា។

លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ក្នុងនាមក្រសួងអប់រំ យុវជន និងកីឡា បានកោតសរសើរ និងវាយតម្លៃខ្ពស់ ចំពោះលទ្ធផលការងារថ្មីៗ របស់ស្ថានទូតជប៉ុនប្រចាំព្រះរាជាណាចក្រកម្ពុជា តាមរយៈគម្រោងគូសាណូណ៌ និងអង្គការក្រៅរដ្ឋាភិបាលបេះដូងមាស ដែលបានជួយឧបត្ថម្ភជាផ្លូវរត់អត្តពលកម្ម ៨ខ្សែបន្ទាត់ ព្រមទាំងអាងហែលទឹក និងអគារធ្វើលំហាត់ប្រាណ ដោយមានបំពាក់សម្ភារបរិក្ខា សម្ភារកីឡា និងការរៀបចំកម្មវិធីសិក្សាបរិញ្ញាបត្រ សិល្បៈមនុស្សសាស្រ្ត ឯកទេស អប់រំកាយ ការអភិវឌ្ឍធនធានមនុស្ស នៅវិទ្យាស្ថានជាតិអប់រំកាយ និងកីឡា។ លោករដ្ឋមន្ត្រីបានចាត់ទុកថា នេះជាការរួមចំណែកក្នុងការអភិវឌ្ឍហេដ្ឋារចនាសម្ព័ន្ធ ដើម្បីអភិវឌ្ឍវិទ្យាស្ថានជាតិអប់រំកាយ និងកីឡា ឱ្យក្លាយជាគ្រឹះស្ថានឧត្តមសិក្សា នាពេលខាងមុខ៕

អ្នកអាចចែករំលែកដោយ៖

អត្ថបទទាក់ទង
turkce.yurtdisi-fx.comagario paper.io 2 agarioTürkiye’den İngiltere’ye eşya taşıma gebze evden eve nakliyat
zonguldak son dakika