ផ្លឹស-ខេអេក ញូវ

រដ្ឋមន្ត្រីក្រសួងអប់រំ៖ ករណីសង្ស័យមានកូវីដ១៩ បេក្ខជនប្រឡងបាក់ឌុបឆ្នាំនេះ ធ្វើតេស្តដោយខ្លួនឯង ជៀសវាងប្រឡងដោយឡែកតែម្នាក់ឯង

សង្គម
December 20th, 2021 (3 years)
Views: 142
Share

ភ្នំពេញ៖ រដ្ឋមន្ត្រីក្រសួងអប់រំអំពាវនាវដល់សិស្សដែលត្រូវប្រឡងបាក់ឌុប នៅថ្ងៃទី២៧ ខែធ្នូ ឆ្នាំ២០២១ បើករណី
សង្ស័យថាខ្លួនមានកូវីដ១៩ ត្រូវធ្វើតេស្តដោយខ្លួនឯងឱ្យរួចរាល់ពីឥឡូវ ដើម្បីជៀសវាងត្រូវការលំបាកប្រឡង
ដោយឡែកតែម្នាក់ឯង។

នៅក្នុងសន្និសីទសារព័ត៌មាននៅក្រសួងអប់រំ យុវជន និងកីឡានៅថ្ងៃទី២០ ខែធ្នូនេះ ស្តីពីដំណើរ
ការប្រឡងមធ្យមសិក្សាទុតិយភូមិ ឬបាក់ឌុប ដែលប្រព្រឹត្តទៅនៅថ្ងៃទី ២៧ និង២៨ ខែធ្នូនេះ លោក
ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានធ្វើការអំពាវនាវទៅដល់សិស្សានុសិស្សទាំងអស់
ដែលត្រូវប្រឡងបាក់ឌុបនៅពេលខាងមុខនេះ បើក្នុងករណីសង្ស័យថាខ្លួនអាចមានពាក់ពន្ធ័ទៅនឹងបញ្ហាជំងឺ
កូវីដ១៩ ត្រូវធ្វើតេស្តដោយខ្លួនឯងឱ្យរួចរាល់ចាប់ពីឥឡូវរហូតដល់មុនថ្ងៃប្រឡងមកដល់ ដើម្បីជៀសវាងមាន
បញ្ហាអ្វីមួយនៅថ្ងៃប្រឡង ខណៈក្រុមការងារក្រសួងនៅតាមមណ្ឌលប្រឡងនីមួយៗនឹងធ្វើការវាស់កម្ដៅសម្រាប់
បេក្ខជនទាំងអស់មុនពេលអនុញ្ញាតឱ្យចួលប្រឡង ហើយបើក្នុងករណីមានកម្ដៅខ្លួនលើស ឬក៏មានរោគ
សញ្ញាសង្ស័យអ្វីមួយ បេក្ខជននោះ ត្រូវដាក់ឱ្យប្រឡងនៅបន្ទប់ដាច់ដោយឡែកមួយផ្សេងដែលបានរៀប
ចំដោយក្រុមការងារក្រសួង។

គួរបញ្ជាក់ថា សម្រាប់ការប្រឡងបាក់ឌុបឆ្នាំនេះនឹងប្រព្រឹត្តទៅរយៈពេល ២ថ្ងៃគឺនៅថ្ងៃទី២៧
និង២៨ ខែធ្នូនេះ ដែលមានបេក្ខជនចុះឈ្មោះប្រឡងសរុបចំនួន ១១៤.១៨៣ នាក់ ក្នុងនោះសិស្សស្រីចំនួន
៦០.៣៩៧ នាក់ ដោយចែកចេញជា ២០៤ មណ្ឌល ស្មើនឹង ៤.៦១៦ បន្ទប់ ដោយក្នុងមួយបន្ទប់មានបេក្ខជន
ចំនួន ២៥ នាក់ ខណៈលទ្ធផលប្រឡងក្រសួងអប់រំបានកំណត់យកថ្ងៃទី ១៨ ខែមករា ឆ្នាំ២០២២ ពេល
រសៀល ជាពេលប្រកាសសម្រាប់រាជធានីភ្នំពេញ និងខេត្តកណ្តាល និងនៅថ្ងៃ ១៩ ខែមករាដដែលសម្រាប់
លទ្ធផលប្រឡងរបស់សិស្សនៅខេត្តផ្សេងៗ។ ជាមួយគ្នានេះ រដ្ឋមន្ត្រីក្រសួងអប់រំ បានឲ្យដឹងថា របបពិន្ទុប្រឡងសញ្ញាបត្រមធ្យមសិក្សាទុតិយភូមិ អតិបរមា គឺ ៥០០ពិន្ទុ ប៉ុន្តែដោយមុខវិជ្ជាភាសាបរទេសជាវិញ្ញាសាតាមស្ម័គ្រចិត្ត ដូច្នេះពិន្ទុប្រឡងជាប់ គឺ ៥០០ដក២៥ រួចចែកនឹង២ ស្មើនឹង ២៣៧,៥ពិន្ទុ យកត្រឹម ២៣៧ ពិន្ទុជាប់៕

អត្ថបទ៖ គិន ច័ន្ទពុទ្ធិ

អត្ថបទទាក់ទង