ផ្លឹស-ខេអេក ញូវ

អាជ្ញាធរជាតិអប្សរា ធ្វើកំណាយនៅទួលឡដុតកុលាលភាជន៍នៅក្រុមឡទ្វារដីឆ្នាំង

សង្គម
February 3rd, 2022 (3 years)
Views: 390
Share

សៀមរាប៖ នៅដើមខែកុម្ភៈ ឆ្នាំ២០២២ អាជ្ញាធរជាតិអប្សរា តាមរយៈមជ្ឈមណ្ឌលអន្ដរជាតិស្រាវជ្រាវ និងតម្កល់ឯកសារអង្គរ បានចាប់ផ្តើមធ្វើកំណាយស្រាវជ្រាវនៅទួលឡដុតកុលាលភាជន៍មួយទៀត នៅក្រុមឡទ្វារដីឆ្នាំង ស្ថិតនៅពាយព្យខ្លោងទ្វារដីឆ្នាំង ក្រុងអង្គរធំ។ នេះបើយោងតាមការឱ្យដឹងពីអាជ្ញាធរជាតិអប្សរា នៅថ្ងៃទី៣ ខែកុម្ភៈ ឆ្នាំ២០២២។

លោក ទិន ទីណា អនុប្រធានមជ្ឈមណ្ឌលអន្ដរជាតិស្រាវជ្រាវ និងតម្កល់ឯកសារអង្គរ បានឱ្យដឹងថា កាលពីចុងឆ្នាំ២០១៩កន្លងមក ក្រុមការងាររបស់លោកបានធ្វើកំណាយជាលើកដំបូងនៅទួលបុរាណមួយ ដែលមានឈ្មោះថា ទួលត្រពាំងបុស្ស ដោយរកឃើញឡដុតកុលាលភាជន៍មួយកន្លែង ស្ថិតនៅពាយព្យខ្លោងទ្វារដីឆ្នាំង។ ការធ្វើកំណាយដែលចាប់ផ្តើមនៅខែវិច្ឆិកា ឆ្នាំ២០១៩ និងបញ្ចប់នៅខែកុម្ភៈ ឆ្នាំ២០២០ អ្នកស្រាវជ្រាវបានរកឃើញ ជារចនាសម្ពន្ធឡបុរាណមួយដែលចាប់ផ្តើមផលិតកុលាលភាជន៍នៅពាក់កណ្ដាលសតវត្សរ៍ទី១២ និងបញ្ចប់នៅពាក់កណ្ដាលសតវត្សរ៍ទី១៣។

លោកបន្ថែមថា ការធ្វើកំណាយនៅត្រពាំងទួលបុស្ស ដែលអ្នកស្រាវជ្រាវឱ្យឈ្មោះថា TDCK1 ឃើញមានរចនាសម្ពន្ធខុសពីឡដុតកុលាលភាជន៍នៅតំបន់អង្គរ ដូចជា នៅតានី ខ្នារពោធិ៍ សសិ និងអន្លង់ធំ ដែលឡទាំងនោះមានប្រវែងវែង តែឡបុរាណនៅត្រពាំងទួលបុស្សនេះ មានទំហំស្ទើរមូល ដោយមានមុខកាត់២ម៉ែត្រ និងបណ្ដោយ៣ម៉ែត្រ។ ការធ្វើកំណាយនៅទួលថ្មីនេះ ដើម្បីប្រៀបធៀបលទ្ធផលស្រាវជ្រាវនៅនឹងទីតាំងឡទី១ ដោយចង់បញ្ជាក់ថា តើរចនាសម្ពន្ធទីតាំងទាំងពីរដូចគ្នា ឬយ៉ាងណា ដ្បិតថា គេឃើញទួលតូចធំចំនួន ២៤កន្លែង ដោយមានមន្ទិល ក្រែងឡទាំងនោះមានមុខងារផ្សេងគ្នាជាដើម៕

អត្ថបទទាក់ទង

អាជ្ញាធរជាតិ​អប្សរា ធ្វើ​កំណាយ​នៅទួលឡ​ដុតកុលាលភាជន៍​នៅ​ក្រុមឡទ្វារដីឆ្នាំង

អាជ្ញាធរជាតិអប្សរា ធ្វើកំណាយនៅទួលឡដុតកុលាលភាជន៍នៅក្រុមឡទ្វារដីឆ្នាំង