ផ្លឹស-ខេអេក ញូវ

អ្នកវិទ្យាសាស្រ្តវះកាត់ប្ដូរតម្រងនោមមនុស្ស ដាក់តម្រងនោមជ្រូកបានជោគជ័យ

សង្គម
February 16th, 2022 (3 years)
Views: 132
Share

ក្រុមអ្នកវិទ្យាស្ត្របានវះកាត់ប្ដូរតម្រងនោមមនុស្សដាក់ជំនួសដោយតម្រងនោមជ្រូកបានយ៉ាងជោគជ័យ ដោយថាក្រោយវះកាត់ប្ដូររួចហើយ តម្រងនោមទាំងពីរបានពីជ្រូកចិញ្ចឹមបែបបំប្លែងហ្សែននេះ បានដំណើរការជាប្រក្រតី ក្នុងអំឡុងពេលពិសោធន៍។

ការពិសោធនេះ បានធ្វើឡើងលើអ្នកជំងឺស្លាប់ខួរក្បាលម្នាក់ និងក៏ជាអ្នកដែលបានចុះឈ្មោះស្ម័គ្រចិត្តបរិច្ចាគសរីរាង្គផងដែរ ហើយការពិសោធនេះក៏បានការអនុញ្ញាតពីក្រុមគ្រួសារអ្នកជំងឺដែរ។
អ្នកជំងឺស្លាប់ខួរក្បាលសំដៅដល់អ្នកជំងឺដែលអាចរស់រានមានជីវិតបានដោយសារម៉ាស៊ីនជំនួយ ហើយខួរក្បាល មិនមានដំណើរការទៀតនោះទេ។ ការណ៍នេះ មានន័យថា អ្នកជំងឺមិនអាចដឹងខ្លួនវិញបានដែរ ហើយក៏មិនអាចដកដង្ហើមដោយគ្មានម៉ាស៊ីនជំនួយដែរ។ តាមច្បាប់នៅប្រទេសមួយចំនួន អ្នកជំងឺស្លាប់ខួរក្បាល ត្រូវគេកំណត់ថាជាមនុស្សស្លាប់។

លទ្ធផលនៃការពិសោធនេះ បានចុះផ្សាយក្នុង American Journal of Transplantation កាលពីថ្ងៃទី២០ ខែមករា ឆ្នាំ២០២២។ ក្រុមអ្នកវិទ្យាសាស្រ្តក៏មានបំណងធ្វើការពិសោធលើអ្នកជំងឺធម្មតាផងដែរ ប៉ុន្តែជាជំហានដំបូង ក្រុមអ្នកវិទ្យាសាស្រ្ត ត្រូវធ្វើលើអ្នកជំងឺស្លាប់ខួរក្បាលសិនដើម្បីដឹងពីកម្រិតសុវត្ថិភាព និងស្រាយចម្ងល់មួយចំនួនបាន។

ក្រុមអ្នកវិទ្យាសាស្រ្ត បានតាមដានលើអាការៈរបស់អ្នកទទួលការផ្លាស់ប្ដូរតម្រងនោមនេះជាច្រើនចំណុច ដូចជាថាតើមានប្រតិកម្មរបស់រាងកាយមិនទទួលយកតម្រងនោមជ្រូកនេះឬអត់(ផ្សាំបរាជ័យ) មានឆ្លងវីរុសៗផ្សេងៗដែរទេ និងក៏ដូចជាផលរំខានដែលអាចកើតឡើងក្នុងដំណើរការប្ដូរតម្រងនោមជ្រូក មកមនុស្ស។

កាលពីខែកញ្ញា ឆ្នាំ២០២១ ក្រុមវេជ្ជបណ្ឌិត ក៏បានធ្វើពិសោធន៍ប្រហាក់ប្រហែលគ្នានេះដែរ លើអ្នកជំងឺស្លាប់ខួរក្បាល តែកាលនោះធ្វើតែលើតម្រងនោមម្ខាង និងមិនបានដាក់ចូលក្នុងខ្លួនមនុស្សដូចពេលនេះទេ ហើយក៏ឃើញថាតម្រងនោមបានដំណើរការធម្មតាក្នុងរយៈពេលពិសោធន៍៥៤ម៉ោង។ បើតាមការពិសោធន៍ តម្រងនោមអាចចម្រោះជាតិពុលពីក្នុងឈាម និងផលិតទឹកនោមបានដោយមិនមានសញ្ញាពីការផ្សាំបរាជ័យឡើង។

តម្រងនោមជ្រូកដែលយកមកប្រើជំនួសតម្រងនោមមនុស្សនេះ គឺបានពីជ្រូកដែលក្រុមហ៊ុនចិញ្ចឹមតាមបែបបំប្លែងហ្សែន។ ដូចគ្នាដែរ កាលពីដើមខែមករា នេះក្រុមអ្នកវិទ្យាសាស្រ្តក៏បានប្រកាសពីភាពជោគជ័យលើការពិសោធន៍ផ្លាស់ប្ដូរបេះដូងមនុស្ស ជំនួសដោយបេះដូងជ្រូកនេះផងដែរ៕

ប្រភព៖ Hellokrupet

អត្ថបទទាក់ទង

អ្នកវិទ្យាសាស្រ្ត​វះកាត់​ប្ដូរតម្រងនោម​មនុស្ស ដាក់តម្រងនោម​ជ្រូក​បាន​ជោគជ័យ

អ្នកវិទ្យាសាស្រ្តវះកាត់ប្ដូរតម្រងនោមមនុស្ស ដាក់តម្រងនោមជ្រូកបានជោគជ័យ