ផ្លឹស-ខេអេក ញូវ

ក្រសួងសុខាភិបាល ណែនាំមន្ត្រីឱ្យយកចិត្តទុកដាក់លើអ្នកដំណើរមកពី១២ប្រទេស ដែលមានរោគសញ្ញាជំងឺអុតស្វា

សង្គម
May 25th, 2022 (3 years)
Views: 347
Share

ភ្នំពេញ៖ ក្រសួងសុខាភិបាល បានណែនាំដល់មន្ត្រីប្រចាំការនៅច្រកចេញចូលអន្តរជាតិ ត្រូវយកចិត្តទុកដាក់ពិនិត្យមើលឱ្យបានហ្មត់ចត់នូវអ្នកដំណើរចូលមកកម្ពុជា ប្រសិនបើមានកន្ទួលរមាស់ ឬចេញពងទឹកនៅលើសរីរាង្គ អមដោយគ្រុនក្ដៅ រួមមានប្រវត្តិធ្វើដំណើរមកពីបណ្ដាប្រទេសប៉ែកខាងអាហ្វ្រិក ដែលមានកើតជំងឺអុតស្វា បែបអង់ដេមី (Monkeypox endemic)។

ប្រទេសទាំងនោះ រួមមាន៖ ១. បេណាំង (Benin), ២. កាមេរ៉ូន (Cameroon), ៣. សាធារណរដ្ឋអាហ្វ្រិកកណ្ដាល (The Central African Republic), ៤. សាធារណរដ្ឋប្រជាធិបតេយ្យកុងហ្គូ (The Democratic Republic of Congo), ៥. ហ្គាបុង (Gabon), ៦. ហ្គាណា (Ghana), ៧. កូដឌីវ័រ (Ivory Coast), ៨. លីបេរី (Liberia), ៩. នីហ្សេរីយ៉ា (Nigeria), ១០. សាធារណរដ្ឋកុងហ្គោ (The Republic of the Congo), ១១. សារ៉ាឡេអូន (Sierra Leone), និង ១២. ប្រទេសស៊ូដង់ខាងត្បូង (South Sudan)។

ក្រសួងសុខាភិបាលបន្តថា គិតត្រឹមថ្ងៃទី២៤ ខែឧសភា ឆ្នាំ២០២២ ព្រះរាជាណាចក្រកម្ពុជា មិនទាន់មានករណីជំងឺអុតស្វា នៅឡើយទេ។ ក្នុងករណីសង្ស័យដោយបុគ្គលមានរោគសញ្ញា៖ ចេញកន្ទួលរមាស់បែបពងទឹកនៅលើដងខ្លួន បាតដៃ បាតជើង និងផ្ទៃមុខ អមដោយរោគសញ្ញាក្ដៅខ្លួនលើសពី ៣៨,៥ អង្សាសេ និងមានឈឺក្បាល ហើមកូនកណ្តុរ ឈឺសាច់ដុំនិងខ្លួនប្រាណ ឈឺចង្កេះ អស់កម្លាំងខ្លាំង រួមជាមួយនឹងប្រវត្តិធ្វើដំណើរទៅ កន្លែងដែលមានកើតជំងឺអុតស្វា ត្រូវដាក់បុគ្គលនោះឱ្យនៅដាច់ដោយឡែក ដើម្បីធ្វើការពិនិត្យសុខភាព ដោយក្រុមគ្រូពេទ្យជាចាំបាច់ភ្លាមៗ ឬអាចបញ្ជូនទៅកាន់មន្ទីរពេទ្យដែលនៅជិត។ ត្រូវធ្វើតេស្តវិភាគនៅមន្ទីរពិសោធន៍ ដោយយកវត្ថុសំណាកដំបៅនៅលើដងខ្លួនអ្នកសង្ស័យ ឬអ្នកឈឺ តាមលក្ខណៈបច្ចេកទេសត្រឹមត្រូវ ហើយបញ្ជូនទៅធ្វើវិភាគនៅមន្ទីរពិសោធន៍ប៉ាស្ទ័រកម្ពុជា។ ការដាក់ឱ្យនៅដាច់ដោយឡែក ត្រូវធ្វើរហូតដល់អ្នកជំងឺបានព្យាបាលជាសះស្បើយ ឬមានការបញ្ជាក់ពីមន្ទីរពិសោធន៍នូវលទ្ធផលអវិជ្ជមានវីរុសអុតស្វានេះ។ ត្រូវសាកសួរដល់អ្នកនៅជុំវិញជាពិសេសក្រុមគ្រួសារ ឬសាច់ញាតិ ឬអ្នកប៉ះពាល់ផ្សេងៗ ដើម្បី តាមដានរកអ្នកឆ្លងបន្តគ្នា៕

អត្ថបទទាក់ទង