ផ្លឹស-ខេអេក ញូវ

ក្រសួងពាណិជ្ជកម្ម នឹងតម្រូវឱ្យការលក់ម្ហូបអាហារនៅតាមផ្សារ និងចិញ្ចើមផ្លូវត្រូវមានអនាម័យល្អ និងសុវត្ថិភាព

សង្គម
May 25th, 2022 (3 years)
Views: 216
Share

ភ្នំពេញ៖ ក្រសួងពាណិជ្ជកម្ម នឹងតម្រូវឱ្យអ្នកលក់ម្ហូបអាហារនៅតាមទីផ្សារ និងចិញ្ចើមផ្លូវ ត្រូវអនុវត្តតាមវិធានការអនាម័យត្រឹមត្រូវ សុវត្ថិភាព និងគុណភាព បន្ទាប់ពីច្បាប់ស្តីពីសុ វត្ថិភាពម្ហូបអាហារចេញជាផ្លូវការ ក្នុងគោលបំណងធានាការពារសុខភាពអ្នកប្រើប្រាស់ ឬអ្នកទទួលទានកុំឲ្យកើតជំងឺផ្សេងៗ និងផ្តល់ទំនុកចិត្តដល់ភ្ញៀវទេសចរបរទេសដែលចូលចិត្តបរិភោគអាហារនៅតាមផ្លូវក្នុងពេលពួកគេមកទស្សនាប្រទេសកម្ពុជា។

សេចក្តីព្រាងច្បាប់ស្តីពីសុវត្ថិភាពម្ហូបអាហារ របស់ក្រសួងពាណិជ្ជកម្ម ត្រូវបានព្រឹទ្ធសភា អនុម័តគាំទ្រទាំងស្រុង ក្នុងសម័យប្រជុំព្រឹទ្ធសភាវិសាមញ្ញ នីតិកាលទី៤ ក្រោមអធិបតីភាព សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា កាលពីថ្ងៃទី១៨ ខែឧសភា ឆ្នាំ២០២២។

តាមរយៈអត្ថប្រយោជន៍របស់ច្បាប់នេះ នឹងមានការសាទរយ៉ាងច្រើនពីប្រជាពលរដ្ឋនៅទូទាំងប្រទេស ខណៈដែលកន្លងមកតែងតែមានការព្រួយបារម្ភអំពីសុវត្ថិភាពចំណីអាហារ ជាពិសេសអាហារលក់តាមផ្សារ និងតាមចិញ្ចើមផ្លូវជាដើម។

លោក ប៉ែន សុជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានឱ្យដឹងថា ច្បាប់ស្តីពីសុវត្ថិភាពម្ហូបអាហារនេះ នឹងមានការដាក់ទោសទណ្ឌទៅលើអ្នកប្រព្រឹត្តកំហុសល្មើសច្បាប់ដែលមានទាំងការពិន័យអន្តរកាល និងទោសព្រហ្មទណ្ឌជាប់ព័ន្ធនាគារពី ២ដល់ ៥ឆ្នាំ ក្នុងករណីចាំបាច់ក៏ដោយក្តី ប៉ុន្តែក្នុងដំណាក់កាលដំបូងក្រសួងនឹងដាក់ពិន័យទៅលើអ្នកលក់នៅតាមផ្សារ និងតាមចិញ្ចើមផ្លូវនោះ ដោយគ្រាន់តែធ្វើការអប់រំណែនាំ និងដាស់តឿនពួកគាត់ប៉ុណ្ណោះ។

ទោះជាយ៉ាងណា អ្នកនាំពាក្យរូបនេះលើកឡើងថា ច្បាប់នេះក៏មានការលើកលែងមួយចំនួនផងដែរ ក្នុងករណីការកែច្នៃម្ហូបអាហារសម្រាប់ទទួលទានឯកជនតាមផ្ទះ ដូចជា នៅក្នុងពិធីជប់លៀងតូចតាចនៅតាមផ្ទះ អ្នកប្រើប្រាស់លក្ខណៈតូចតាច និងអាហារជាចំណីសត្វ ជាដើម។ តែសម្រាប់អាហារនៅក្នុងពិធីមង្គលការ និងពិធីបុណ្យទានផ្សេងៗ ក៏នឹងតម្រូវឱ្យអនុវត្តទៅតាមគោលការណ៍ច្បាប់ជាធរមានផងដែរ៕

អត្ថបទទាក់ទង