×

សត្វឆ្កែ​ចចក​ព្រៃមួយក្បាល ចេញពី​ព្រៃ​មកខាំ​ពលរដ្ឋ​របួស​៧នាក់ នៅក្នុងឃុំខុនរ៉ង ស្រុកបរិបូណ៌

កំពង់ឆ្នាំង៖ មានសត្វឆ្កែចចកព្រៃមួយក្បាល បានចេញព្រៃមកដេញខាំប្រជាពលរដ្ឋបង្កឱ្យរងរបួសជាបន្តបន្ទាប់ចំនួន ៧នាក់ នៅភូមិស្នោ ឃុំខុនរ៉ង ស្រុកបរិបូណ៌ ខេត្តកំពង់ឆ្នាំង កាលពីព្រឹកថ្ងៃទី២៤ ខែឧសភា ឆ្នាំ២០២២
។ នេះបើយោងតាមការឱ្យដឹងពីនគរបាលមូលដ្ឋាននេះ ដែលទទួលបាននៅថ្ងៃទី២៦ ខែឧសភា ឆ្នាំ២០២២។

យោងតាមការបញ្ជាក់របស់ប្រជាពលរដ្ឋថា ក្នុងករណីនេះនៅមុនពេលកើតហេតុមានប្រជាពលរដ្ឋនាំគ្នាទៅយកចង្រិតនៅតាមរណ្ដៅដាក់អំពូល ដែលពួកគាត់បានដាក់នៅចុងភូមិស្នោ ពេលនោះស្រាប់តែមានសត្វឆ្កែចចកព្រៃមួយក្បាលសម្បុរសលាយលឿង បានស្ទុះចេញពីព្រៃមកខាំប្រជាពលរដ្ឋជាច្រើននាក់ ព្រមទាំងរត់ចូលក្នុងភូមិដេញខាំអ្នកស្រុកជាបន្តបន្ទាប់ បណ្ដាលឱ្យរងរបួសប្រជាពលរដ្ឋពី៦ទៅ ៧នាក់។ ក្នុងភូមិនេះមិនមានព្រៃក្រាស់ប៉ុន្មានទេ គ្រាន់តែជាព្រៃរបោះ និងមានគុម្ពឫស្សីព្រៃនៅជាប់ជើងភូមិច្រើនតែប៉ុណ្ណោះ។ សត្វចចកព្រៃមួយក្បាលនេះពលរដ្ឋក្នុងភូមិមិនធ្លាប់ប្រទះឃើញពីមុនមកទេ នៅថ្ងៃកើតហេតុស្រាប់តែវាបានចេញមកដេញខាំពលរដ្ឋតែម្តង។ ក្រោយពីដេញខាំប្រជាពលរដ្ឋឱ្យរងរបួសហើយ សត្វចចកនេះត្រូវបានប្រជាពលរដ្ឋព័ទ្ធដេញវាយសម្លាប់តែម្តង។

សមត្ថកិច្ចបានឱ្យដឹងថា នៅក្រោយកើតហេតុ ប្រជាពលរដ្ឋដែលរងរបួសបានទៅព្យាបាលដោយខ្លួនឯងនៅមន្ទីរពេទ្យបង្អែកស្រុកបរិបូណ៌ ដោយគ្រាន់តែចាក់ថ្នាំ និងព្យាបាលរបួស រួចនាំគ្នាត្រឡប់ទៅផ្ទះរៀងៗខ្លួន។ ពលរដ្ឋដែលត្រូវសត្វឆ្កែចចកព្រៃខាំនោះ មិនមានអ្នករងរបួសធ្ងន់ធ្ងរទេ ប៉ុន្តែពលរដ្ឋបានចាត់ទុកករណីនេះជារឿងម្លែក ហើយនេះជាលើកទីមួយដែលមានចចកព្រៃចេញមកខាំប្រជាពលរដ្ឋបែបនេះ៕

អ្នកអាចចែករំលែកដោយ៖

អត្ថបទទាក់ទង