ផ្លឹស-ខេអេក ញូវ

ក្រសួងសុខាភិបាល រំលឹកឱ្យពលរដ្ឋប្រុងប្រយ័ត្នជាប់ជានិច្ចពីជំងឺអុតស្វា ក្រោយរកឃើញករណីអ្នកជំងឺម្នាក់ បានទៅដល់អូស្ត្រាលី ក្រោយឆ្លងកាត់ប្រទេសថៃ

សង្គម
May 31st, 2022 (3 years)
Views: 157
Share

ភ្នំពេញ៖ រដ្ឋមន្ត្រីក្រសួងសុខាភិបាលកម្ពុជា លោក ម៉ម ប៊ុនហេង នៅថ្ងៃទី៣១ ខែឧសភានេះ បានចេញសេចក្តីណែនាំក្រើនរំលឹកឱ្យពលរដ្ឋកម្ពុជាទាំងអស់ ប្រុងប្រយ័ត្នជាប់ជានិច្ចពីជំងឺអុតស្វា ក្រោយរកឃើញករណីអ្នកជំងឺម្នាក់ បានទៅដល់អូស្ត្រាលី ក្រោយឆ្លងកាត់ប្រទេសថៃ។

ក្នុងសេចក្តីណែនាំក្រើនរំលឹក ក្រសួងសុខាភិបាល បានលើកឡើងថា ក្រោយពីមានការផ្ទុះចេញនូវជំងឺអុតស្វាក្នុងពេលថ្មីៗនេះ បណ្តាប្រទេសចំនួន ២៣ នៅលើសាកលលោកដល មិនមែនជាប្រទេសអង់ដេមីនៃជំងឺនេះ បានរាយការណ៍ជូនទៅអង្គការសុខភាពពិភពលោក (WHO) អំពីករណី ជំងឺអុតស្វា (Monkeypox) មានចំនួនសរុបករណ៍ឈឺ ២៥៧នាក់ និងករណីសង្ស័យ ១២០នាក់ គិតត្រឹម ថ្ងៃទី២៦ ខែឧសភា ឆ្នាំ២០២២ និងមិនទាន់មានករណីស្លាប់នៅឡើយ។

បច្ចុប្បន្ននេះ ក្រៅពីករណីចំនួន ២នាក់ដែលបានរាយការណ៍ពីបណ្តាប្រទេសនៅក្នុងតំបន់ប៉ាស៊ីហ្វិកខាងលិច ក៏មានការរកឃើញ ករណីឆ្លងជំងឺនេះលើអ្នកដំណើរម្នាក់ទៀត ដែលបានមកដល់ប្រទេសអូស្ត្រាលី បើយោងតាមសារព័ត៌មានឌឺសាន់ដេលី (theSundaily) ចេញផ្សាយនៅថ្ងៃទី៣០ ខែឧសភា ឆ្នាំ២០២២ ដោយបុគ្គលនោះ បានហោះហើរឆ្លងកាត់តាមព្រលានយន្តហោះនៃប្រទេសថៃ។

ក្នុងន័យនេះ រដ្ឋមន្ត្រីក្រសួងសុខាភិបាល បានសូមឱ្យប្រជាពលរដ្ឋដែលរស់នៅក្នុងព្រះរាជាណាចក្រកម្ពុជាទាំងអស់ មានការប្រុងប្រយ័ត្នខ្ពស់ និងចូលរួមបន្តអនុវត្តវិធានការ ការពារទុកជាមុននូវការចម្លងជំងឺអុតស្វានេះ ទៅតាមការណែនាំរបស់ក្រសួងសុខាភិបាល ដែលបានចេញផ្សាយតាំងពីថ្ងៃទី២៥ ខែឧសភា ឆ្នាំ២០២២កន្លងទៅនេះ ហើយក្រសួង ក៏សូមធ្វើការក្រើន រំលឹកជូនដល់ប្រជាជនទូទៅ ត្រូវមានការប្រុងប្រយ័ត្នជាប់ជានិច្ច ដោយបុគ្គល គ្រួសារ និងសហគមន៍ ត្រូវ បន្តយកចិត្តទុកដាក់អនុវត្តវិធានការបង្ការការចម្លងជំងឺផ្ទាល់ខ្លួន និងទៅអ្នកដទៃ៕

អត្ថបទទាក់ទង