ផ្លឹស-ខេអេក ញូវ

ជំងឺស្វាយ ដែលបាត់វត្តមានជាច្រើនឆ្នាំ ត្រូវបានរកឃើញថា កំពុងរើឡើងវិញគួរឱ្យបារម្ភ

សង្គម
June 27th, 2022 (2 years)
Views: 103
Share

សៀមរាប៖ ស្វាយ ជាជំងឺកាមរោគមួយប្រភេទដែលពលរដ្ឋខ្មែរស្ទើរតែភ្លេចឈ្មោះទៅហើយនោះ ពេលនេះ ត្រូវបានមន្ត្រីសុខាភិបាលអះអាងថា កំពុងតែផ្ទុះឡើងគួរឱ្យបារម្ភ ។

លោកសាស្ត្រាចារ្យ វេជ្ជបណ្ឌិត យ៉ៃ ចន្ទនា នាយកមន្ទីរពេទ្យជ័យវរ្ម័នទី៧ឬមន្ទីរពេទ្យគន្ធបុប្ផាទី៣នៅខេត្តសៀមរាប បានឱ្យដឹងថា ក្នុងអំឡុងប្រមាណជាង១ខែ ពីខែឧសភាដល់ខែមិថុនា ឆ្នាំ២០២២ មន្ទីរពេទ្យជ័យវរ្ម័នទី៧ ខេត្តសៀមរាប បានពិនិត្យឃើញអ្នកមានជំងឺកាមរោគ ប្រភេទជំងឺស្វាយ មានចំនួន៣៨ករណី នៅលើស្ត្រីមានផ្ទៃពោះដែលមកសម្រាលកូន និងទារកទើបនឹងកើតចំនួនមាន១១ករណី។ លោកថា នេះជាលើកដំបូងសម្រាប់មន្ទីរពេទ្យនេះ ខណៈពីមុនមកមានម្នាក់ ឬពីរនាក់ប៉ុណ្ណោះដែលពិនិត្យឃើញមានជំងឺស្វាយ។

ការរកឃើញនូវជំងឺកាមរោគប្រភេទស្វាយនេះ រដ្ឋមន្ត្រីក្រសួងសុខាភិបាល លោក សាស្ត្រាចារ្យ ម៉ម ប៊ុនហេង បានបង្ហាញនូវក្នុងបារម្ភ និងជំរុញឱ្យគ្រូពេទ្យត្រូវយកចិត្តទុកដាក់ព្យាបាលអ្នកជំងឺប្រភេទនេះ ដើម្បីកុំឱ្យមានការចម្លងទៅអ្នកដទៃ។

ក្នុងឱកាសចុះមកពិនិត្យមើលស្ថានភាពអ្នកជំងឺ នៅមន្ទីរពេទ្យកុមារជ័យវរ្ម័នទី៧នេះ នាថ្ងៃទី២៧ ខែមិថុនា ឆ្នាំ២០២២លោក សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល មានប្រសាសន៍ថា នេះជាការកើតរើឡើងវិញនូវជំងឺស្វាយជាប្រភេទជំងឺកាមរោគដែលយើងទាំងអស់គ្នាមិនត្រូវធ្វេសប្រហែសជាដាច់ខាត។ លោករដ្ឋមន្ត្រី ថា ចំពោះបញ្ហានេះ ក្រសួងសុខាភិបាល កំពុងយកចិត្តទុកដាក់ និងពិភាក្សាជាមួយមជ្ឈមមណ្ឌលជាតិប្រយុទ្ធនឹងជំងឺអេដស៍ ជំងឺសើស្បែកនិងកាមរោគ ដើម្បីបន្តការអប់រំដល់ប្រជាពលរដ្ឋដើម្បីការពារ ទប់ស្កាត់ការឆ្លងឡើងវិញនៃជំងឺនេះ៕

អត្ថបទ៖ ជា ស្រស់

អត្ថបទទាក់ទង

ជំងឺស្វាយ ដែល​បាត់​វត្តមាន​ជាច្រើនឆ្នាំ ត្រូវបាន​រកឃើញថា កំពុង​រើឡើងវិញ​គួរឱ្យបារម្ភ

ជំងឺស្វាយ ដែលបាត់វត្តមានជាច្រើនឆ្នាំ ត្រូវបានរកឃើញថា កំពុងរើឡើងវិញគួរឱ្យបារម្ភ