ផ្លឹស-ខេអេក ញូវ

អាជ្ញាធរអំពាវនាវឱ្យពលរដ្ឋប្រុងប្រយ័ត្ន ខណៈកម្ពស់ទឹកទន្លេទាំង២ខ្សែកំពុងហក់ឡើង នៅខេត្តរតនគិរី

សង្គម
August 9th, 2022 (2 years)
Views: 161
Share

អត្ថបទ៖ ប៉េស សារី

រតនគិរី៖ កម្ពស់ទឹកទឹកទន្លេសេសាន និងទន្លេស្រែពក កំពុងហក់ឡើងគួរឱ្យព្រួយបារម្ភដោយសារភ្លៀងធ្លាក់ជាប់ៗគ្នារយៈពេលជិត មួយសប្តាហ៍មកហើយ។ នេះបើតាមរបាយការណ៍ពីអាជ្ញាធរស្រុកវើនសៃ និងស្រុកលំផាត់បានឲ្យដឹងនៅព្រឹកថ្ងៃទី០៩ ខែសីហា ឆ្នាំ ២០២២ គិតត្រឹមវេលាម៉ោង ៧និង៣០នាទី។

តាមការបញ្ជាក់ពីលោក ហេង សាវឿន អភិបាលស្រុកវើនសៃឱ្យដឹងថាទឹកទន្លេសេសាន នៅព្រឹកនេះគិតត្រឹមម៉ោង៧និង៣០នាទីមានកម្ពស់៧,៧០ម៉ែត្រ ខណៈចំណុចប្រកាសអាសន្ន៨,៥០ម៉ែត្រដោយមើលឃើញអាកាសធាតុនៅតែបន្តធ្លាក់ភ្លៀងជាប់ៗគ្នានោះលោកអភិបាលស្រុកបានបញ្ជាមន្ត្រីក្រោមឱវាទឱ្យនៅជាប់កៀកជាមួយប្រជាពលរដ្ឋនិងតាមដានកម្ពស់ទឹកដើម្បីត្រៀមលក្ខណៈជួយប្រជាពលរដ្ឋកុំឱ្យមានការជួបគ្រោះថ្នាក់ដល់អាយុជីវិត។

ជាមួយគ្នានេះលោកអភិបាលស្រុកក៏បានអំពាវនាវដល់ប្រជាពលរដ្ឋទាំងអស់ត្រូវប្រុងប្រយ័ត្ន និងត្រៀមលក្ខណៈឱ្យបានគ្រប់ក្រុមគ្រួសារដែលរស់នៅតាមដងទន្លេសេសានទាំងអស់។

ទន្ទឹមនឹងនេះលោក នូ ថេ អភិបាលស្រុកលំផាត់ក៏បានឱ្យដឹង ដែរថាគិតត្រឹមម៉ោង ៧ និង ៣០ នាទី ចំពោះកម្ពស់ទឹកទន្លេស្រែពកនៅស្ថានីយមុខវត្តលំផាត់បានហក់ឡើងដល់ ១០,៣០ម៉ែត្រខណៈចំណុចប្រកាសអាសន្នកម្ពស់១២, ៥០ម៉ែត្រ។

លោកអភិបាលស្រុកបានត្រៀមកម្លាំងអន្តរាគមន៍ និងអំពាវនាវដល់ប្រជាពលរដ្ឋដែលរស់នៅតាមដងទន្លេស្រែពកឱ្យប្រុងប្រយ័ត្ននិងត្រៀមលក្ខណៈឱ្យបានគ្រប់ៗគ្នា ក្នុងករណីចាំបាច់ភៀសខ្លួនទៅកាន់ទីទួលសុវត្ថិភាពឱ្យទាន់ពេលវេលា៕

អត្ថបទទាក់ទង