ផ្លឹស-ខេអេក ញូវ

កូរ៉េខាងត្បូងចង់ឆ្លងផុតវគ្គ16ក្រុមចុងក្រោយជាលើកដំបូងក្នុងរយៈពេល20ឆ្នាំពេលប៉ះប្រេស៊ីល

កីឡា
December 5th, 2022 (2 years)
Views: 103
Share

កូរ៉េខាងត្បូង នឹងត្រូវប្រកួតតទល់នឹងក្រុមជើងឯក5 សម័យកាលប្រេស៊ីល នៅក្នុងវគ្គ 16 ក្រុមចុងក្រោយ នៃព្រឹត្តិការណ៍ FIFA World Cup Qatar 2022 នៅកីឡដ្ឋាន 974 ក្នុងគោលបំណងតែមួយគត់គឺការឆ្លងទៅកាន់វគ្គបន្ទាប់ ដែលពួកគេបានខកខានអស់រយៈពេល 20 ឆ្នាំមកហើយ។

ក្រុមរបស់អ្នកចាត់ការ Paulo Bento បានយកឈ្នះទៅលើព័រទុយហ្គាល់ ក្នុងការប្រកួតចុងក្រោយនៅពូល H របស់ពួកគេ ដើម្បីបញ្ចប់នៅចំណាត់ថ្នាក់លេខ2 ពីលើអ៊ុយរុយហ្គាល់ តាមរយៈចំនួនគ្រាប់បាល់។ កូរ៉េខាងត្បូង មិនធ្លាប់ឆ្លងផុតវគ្គ 16 ក្រុមចុងក្រោយទេ ចាប់តាំងពីឆ្នាំ 2002 មក។

សម្រាប់ប្រេស៊ីល ការបរាជ័យក្រោមថ្វីជើងរបស់កាម៉េរូនកាលពីប្រកួតចុងក្រោយ ក្នុងពូល G បានបញ្ចប់កំណត់ត្រាឈ្នះ 9 ប្រកួតជាប់ៗគ្នារបស់ក្រុមសាំបាផងដែរ។ ទោះជាយ៉ាងណា ការទទួលបានជ័យជម្នះលើស៊ែប និងស្វីស ហាក់មិនបានបង្ហាញពីការគំរាមកំហែងដ៏គួរឱ្យព្រឺព្រួចរបស់ប្រយុទ្ធនៃក្រុមប្រេស៊ីល ដូចជាក្រុមខ្លាំងដទៃទៀតឡើយ។ ជាក់ស្ដែង ក្រុមជើងឯក 5 សម័យ មិនបានស៊ុតបញ្ចូលទីទៅលើគូប្រកួតឡើយនៅក្នុងវគ្គទីមួយ កាលពីប្រកួតកន្លងទៅ។

ប្រេស៊ីល បានឆ្លងទៅដល់វគ្គចាញ់ធ្លាក់ World Cup ជាលើកទី 9 ជាប់ៗគ្នា ហើយគ្មានក្រុមណាអាចទម្លាក់ពួកគេបានឡើយនៅវគ្គ 16 ក្រុមចុងក្រោយ ក្នុងរយៈពេល 32 ឆ្នាំកន្លងទៅ។

សូមជម្រាបថា ការប្រកួតរវាងកូរ៉េខាងត្បូង ជាមួយប្រេស៊ីល នឹងមានផ្សាយបន្តផ្ទាល់ផ្ដាច់មុខនៅលើកញ្ចក់ទូរទស្សន៍ CTN, MyTV និង CNC តែមួយកត់ ចាប់ពីម៉ោង 1:30 នាទីរំលងអធ្រាត្រយប់នេះតទៅ៕

អត្ថបទទាក់ទង