×

Man City បញ្ជាក់ថា Gundoganបានក្លាយជាកីឡាកររបស់Barcelonaជាផ្លូវការ

ក្លិប Manchester City បានបញ្ជាក់ថា ប្រធានក្រុមរបស់ពួកគេគឺកីឡាករ Ilkay Gundogan បានចាកចេញពីក្លិប ហើយចូលរួមជាមួយក្លិប Barcelona ដោយគ្មានតម្លៃផ្ទេរ។ កិច្ចសន្យារបស់ Gundogan ជាមួយ Barcelona មានលក្ខខណ្ឌទិញផ្ដាច់ ៤០០ លានអឺរ៉ូ។

Man City បានផ្តល់ជូនកិច្ចសន្យាថ្មីសម្រាប់ Gundogan ប៉ុន្តែរូបគេបានជ្រើសរើសការផ្លាស់ទៅកាន់ម្ចាស់ជើងឯកលីគកំពូលអេស្ប៉ាញ ក្នុងកិច្ចសន្យារយៈពេលពីរឆ្នាំ។ ខ្សែបម្រើសញ្ជាតិអាល្លឺម៉ង់ ដែលផុតកុងត្រាពី City នៅចុងខែមិថុនា បាននិយាយថា វាគឺជាកិត្តិយសដែលបានលេងឱ្យ City ។

Gundogan បានបន្ថែមនៅក្នុងសេចក្តីថ្លែងការណ៍មួយថា “Manchester គឺជាផ្ទះរបស់ខ្ញុំ ហើយខ្ញុំមានអារម្មណ៍ថាជាផ្នែកមួយនៃគ្រួសារដ៏ពិសេសមួយនៅ City”។ កីឡាករវ័យ ៣២ ឆ្នាំរូបនេះលេងបាន ៥១ ប្រកួតក្នុងរដូវកាល ២០២២-២៣ ដោយស៊ុតបញ្ចូលទីបាន ១១ គ្រាប់ ខណៈដែលរួបគេបានដើរតួយ៉ាងសំខាន់ក្នុងក្រុម Man City ឈ្នះពានរង្វាន់៣ក្នុងរដូវកាលតែមួយ។

រូបគេបានស៊ុតបញ្ចូលទី ៦ គ្រាប់ក្នុងការប្រកួត ៧ លើកចុងក្រោយ រួមទាំងការស៊ុតបញ្ចូលទី២គ្រាប់ ក្នុងការប្រកួតវគ្គផ្តាច់ព្រ័ត្រពានរង្វាន់ FA Cup ដែលបានយកឈ្នះលើ Manchester United ដោយលទ្ធផល ២-១។

Gundogan បានចូលរួមជាមួយ Man City ពីក្រុម Borussia Dortmund ក្នុងតម្លៃ ២០ លានផោនក្នុងឆ្នាំ២០១៦។ រូបគេបានបន្តបង្ហាញខ្លួនចំនួន ៣០៤ លើក ស៊ុតបញ្ចូលទីបាន ៦០ គ្រាប់ និងបានឈ្នះពានរង្វាន់ធំៗចំនួន ១២ ដូចជា ពាន Premier League ចំនួន ៥ ដង Champions League ចំនួន ១ ដង FA Cup ចំនួន ២ ដង និង Carabao Cup ចំនួន ៤ ដង៕

អ្នកអាចចែករំលែកដោយ៖

អត្ថបទទាក់ទង