ផ្លឹស-ខេអេក ញូវ

ប៉ាម៉ាក់គួរដោះស្រាយបែបណា បើកូនភ្ញាក់ពីព្រលឹមពេក?

សុខភាព មាតា ទារក
August 2nd, 2023 (1 year)
Views: 346
Share

ការគេងបានស្កប់ស្កល់មានសារៈសំខាន់ណាស់ សម្រាប់កុមារតូចៗ ទាំងរាងកាយ និងស្មារតី។ ប៉ុន្តែ ចុះបើកូនឆាប់ភ្ញាក់ពីគេង ហើយមានអាការហត់នឿយ និងរញ៉ាំរញ៉ូវ ប៉ាម៉ាក់គួរដោះស្រាយបែបណា?

មូលហេតុកុមារតូចៗឆាប់ភ្ញាក់ពីព្រលឹមពេក
តាមធម្មតា កុមារតូចៗតែងភ្ញាក់ពីព្រលឹម ប៉ុន្តែមូលហេតុមួយចំនួន អាចបណ្តាលឱ្យកូនភ្ញាក់កាន់តែលឿនជាងរាល់ដងទៅទៀត៖
• គេងថ្ងៃច្រើនជ្រុល
• ខោទឹកនោមសើម
• ដុះធ្មេញ ហត់នឿយខ្លាំង ឬឃ្លាន
• ឆាប់រំញោចទៅនឹងពន្លឺ សីតុណ្ហភាព ឬសំឡេង
• អាលែកហ្ស៊ី ឬតឹងច្រមុះ
• ច្រាល់អាស៊ីដ ឬឈឺក្រពះ

ប៉ាម៉ាក់គួរដោះស្រាយបែបណា?
១. កំណត់ម៉ោងគេងឡើងវិញ
បើកូនឆាប់ភ្ញាក់ពីគេងពេក អាចមកពីកូនឆាប់ចូលគេងពីព្រលប់ពេក។ ដូច្នេះហើយ ប៉ាម៉ាក់គួរពន្យារពេលគេងរបស់កូនប្រហែលជា១៥នាទីជារៀងរាល់យប់ រយៈពេល១ទៅ២សប្តាហ៍។ មួយវិញទៀត យើងមិនត្រូវផ្លាស់ប្ដូរម៉ោងគេងរបស់កូនច្រើនម៉ោងពេកឡើយ ពីព្រោះទង្វើនេះ អាចឱ្យអាអូនហត់នឿយខ្លាំង និងពិបាកគេងនៅពេលយប់។

២. កំណត់ម៉ោងគេងថ្ងៃ
ពិតណាស់ បើកូនគេងច្រើននៅពេលថ្ងៃ នោះអាចនឹងប៉ះពាល់ដល់ការគេងយប់មិនខាន។ ដូចនេះ ហើយ ប៉ាម៉ាក់គួរកំណត់ម៉ោងគេងថ្ងៃ ដូចខាងក្រោម៖
• កុមារអាយុ២ឆ្នាំ គួរគេង២ម៉ោង
• កុមារអាយុ២ឆ្នាំកន្លះ គួរគេង១ម៉ោងកន្លះ
• កុមារអាយុ៣ឆ្នាំ គួរគេង១ម៉ោង

៣. បន្ថយពន្លឺ និងសំឡេងរំខាន
ការរៀបចំបន្ទប់ដែលមានសភាពរាងងងឹត អាចជួយឱ្យក្មេងគេងបានកាន់តែយូរម៉ោង។ មួយវិញទៀត សំឡេងរំខានខ្លះ ក៏អាចជាមូលហេតុដែលធ្វើឱ្យកូនតូចភ្ញាក់លឿនផងដែរ។ អ៊ីចឹងហើយ ប៉ាម៉ាក់គួរប្រើសម្ភារកាត់បន្ថយសំឡេងនៅក្នុងបន្ទប់ ដូចជាវាំងនន ឬកម្រាលឥដ្ឋក្រាស់ៗ។

៤. កាត់បន្ថយការញ៉ាំទឹក
ជាមួយគ្នានេះដែរ បើកូនភ្ញាក់លឿនជ្រុល ដោយសារតែខោទឹកនោមសើម ប៉ាម៉ាក់គួរកាត់បន្ថយការផ្តល់ជាតិទឹកដល់កូន មុនម៉ោងគេង។ បន្ថែមពីនេះ យើងក៏អាចសាកល្បងប្រើខោទឹកនោមសម្រាប់ពេលយប់ដែលមានកម្រាស់វែងជាងខោទឹកនោមធម្មតា។

៥. សង្កេតមើលបញ្ហាសុខភាពក្មេង
ចំពោះកុមារតូចៗដែលដុះធ្មេញ ឬមានជំងឺគ្រុនផ្ដាសាយ ឬអាលែកហ្ស៊ី អាចនឹងភ្ញាក់ពីព្រលឹមជ្រុល។ មួយវិញទៀត ប៉ាម៉ាក់ក៏គួរតាមដានពីបញ្ហាសុខភាពមួយចំនួនដូចជា ជំងឺច្រាល់អាស៊ីដក្រពះ ឬគេងមិនដកដង្ហើម៕

ប្រភព៖ Hellokrupet

អត្ថបទទាក់ទង