ផ្លឹស-ខេអេក ញូវ

វិធីបង្ការល្អៗ សម្រាប់ស្រ្តីមានផ្ទៃពោះ ចៀសវាងបញ្ហាកូនក្រៅស្បូន

សុខភាព មាតា ទារក
August 3rd, 2023 (4 months)
144
Share

ការបង្កកំណើតស៊ុត (មេជីវិតញី និងឈ្មោល) ជាធម្មតាកាច់សំបុកនៅ១/៣ ខាងក្រៅដៃស្បូន ធ្វើដំណើរចូលមកតួស្បូន ដើម្បីកាច់សំបុក។ ក្នុងករណីដែលស៊ុតធ្វើការកាច់សំបុក ខុសប្រក្រតីនៅក្រៅតួស្បូន គេហៅថាជា កូនក្រៅស្បូន។ នេះបើតាមការឱ្យដឹងរបស់លោកវេជ្ជបណ្ឌិត ឃួន សុវណ្ណារិទ្ធ ឯកទេសផ្នែកសម្ភព និងរោគស្ត្រី។

ជាទូទៅ កូនក្រៅស្បូន មិនអាចរីកលូតលាស់ធំធាត់បានដូចការបង្កកំណើតកូននៅតួស្បូនបានទេ ហើយមូលហេតុដែលធ្វើឲ្យស្ត្រីពពោះប្រឈមនឹងកូនក្រៅស្បូនគឺ ម្ដាយបង្កកំណើតដោយធ្វើ IUI (Intrauterine Insemination) ឬ IVF (In vitro fertilisation) ធ្លាប់មានប្រវត្តិគភ៌ក្រៅស្បូន រលាកអាងត្រគាក ឬធ្លាក់សរ៉ាំរ៉ៃ ជាដើម។

លោកបានណែនាំថា វិធីបង្ការគឺបង្ការជាមួយនឹងមូលហេតុ ឬកត្តាប្រឈមដែលបណ្ដាលឲ្យមានកូនក្រៅស្បូន មាន៖
– កុំជក់បារី
– ការពារឆ្លងកាមរោគ ឬជំងឺឆ្លងតាមការរួមភេទផ្សេងៗ
– ព្យាបាលឱ្យបានត្រឹមត្រូវ ក្នុងករណីស្ត្រីមានការរលាកដៃស្បូន រលាកអាងត្រគាក រលាកទ្វារមាសជាដើម
– ព្យាបាលធ្លាក់ស រោគស្ត្រីផ្សេងៗដោយជួបជាមួយគ្រូពេទ្យជំនាញ ចៀសវាងការប្រើថ្នាំតាមគ្នា ឬប្រើថ្នាំគ្មានវេជ្ជបញ្ជា

លើសពីនេះ វេជ្ជបណ្ឌិតសម្ភពរូបនេះបានណែនាំឱ្យដឹងទៀតថា ម៉ាក់ៗពពោះត្រូវពិនិត្យសុខភាពឱ្យបានទៀងទាត់តាមការកំណត់របស់គ្រូពេទ្យ។ ចំពោះស្ត្រី នៅពេលដែលបាត់រដូវ ពិនិត្យទឹកនោមថាមានគភ៌ ២-៣សប្ដាហ៍ ត្រូវទៅពិនិត្យអេកូមើលថា តើកូនបានចូលមកក្នុងស្បូនហើយឬនៅ ចៀសវាងករណីយឺតយ៉ាវរហូតដល់បែកធ្លាយកូនក្រៅស្បូន ដែលអាចបង្កគ្រោះថ្នាក់ដល់ជីវិត៕

ប្រភព៖ Hellokrupet

អត្ថបទទាក់ទង