ផ្លឹស-ខេអេក ញូវ

តស់មកដឹងពីវិញ្ញាសាដែលបេក្ខជនប្រកួតប្រជែងអាចជួបនៅក្នុងកម្មវិធី MasterChef Cambodia

MasterChef Cambodia
January 9th, 2024 (2 years)
Views: 679
Share

ចាក់ផ្សាយនៅលើកញ្ចក់ទូរទស្សន៍ CTN កម្មវិធី MasterChef Cambodia រដូវកាលទី៣ សន្យាថានឹងផ្ដល់ជូននូវការប្រកួតប្រជែងដ៏រំភើបពីសំណាក់បេក្ខជនដែលមានទេពកោសល្យក្នុងការចម្អិនម្ហូប ភាពច្នៃប្រតិដ្ឋ និងការប្រកួតប្រជែងដ៏ស្វិតស្វាញ។

វិញ្ញាសាមានភាពចម្រុះ ដែលបេក្ខជនត្រូវបញ្ចេញឱ្យអស់ពីសមត្ថភាពរបស់ពួកគេ។ ក្នុងចំណោមវិញ្ញាសាជាច្រើន វិញ្ញាសាមួយដែលគួរឱ្យចាប់អារម្មណ៍គឺ ប្រអប់អាថ៌កំបាំង (Mystery Box) ដែលបេក្ខជនត្រូវច្នៃមុខម្ហូបដោយប្រើតែគ្រឿងផ្សំដែលមាននៅក្នុងប្រអប់អាថ៌កំបាំងប៉ុណ្ណោះ។ គណៈកម្មការនឹងវាយតម្លៃមុខម្ហូបនីមួយៗ ហើយជ្រើសរើសអ្នកឈ្នះដោយផ្អែកលើរសជាតិ និងភាពច្នៃប្រតិដ្ឋ។

វិញ្ញាសាមួយទៀត គឺការធ្វើតេស្តភាពច្នៃប្រតិដ្ឋ (Invention Test) តម្រូវឱ្យបេក្ខជនធ្វើម្ហូបដោយផ្អែកលើប្រធានបទជាក់លាក់ ឬប្រើបច្ចេកទេសជាក់លាក់ណាមួយ។ បន្ទាប់មក គណៈកម្មការនឹងធ្វើការណែនាំឱ្យបេក្ខជនកែតម្រូវ និងជម្រុះមុខម្ហូបដែលទទួលពិន្ទុទាបបំផុតពីគណៈកម្មការ។

វិញ្ញាសាក្រោមសម្ពាធ (Pressure Test) តម្រូវឱ្យបេក្ខជនបង្កើតមុខម្ហូបមួយ ដែលធ្វើដោយមេចុងភៅជំនាញ។ គណៈកម្មការវាយតម្លៃម្ហូបរបស់បេក្ខជនដោយប្រុងប្រយ័ត្ន ដែលអាចនាំទៅដល់ការជម្រុះបេក្ខជនដែលខ្សោយជាងគេ។

វិញ្ញាសាជាក្រុម (Team Challenges) ក៏ជាផ្នែកមួយនៃកម្មវិធីផងដែរ ដែលបេក្ខជនត្រូវធ្វើការរួមគ្នាដើម្បីចម្អិនម្ហូបសម្រាប់មនុស្សមួយក្រុមធំនៅក្នុងផ្ទះបាយអាជីព ឬកន្លែងធ្វើម្ហូបអាហារ។ បេក្ខជន ត្រូវបង្ហាញការសហការ ការគ្រប់គ្រងពេលវេលា និងការប្រើប្រាស់គ្រឿងផ្សំប្រកបដោយប្រសិទ្ធភាព។

វិញ្ញាសាមួយទៀតគឺ ការគ្រប់គ្រងភោជនីយដ្ឋាន (Restaurant Takeover) បេក្ខជនត្រូវទទួលបន្ទុកក្នុងភោជនីយដ្ឋានមួយ រួមទាំងការបង្កើតមុខម្ហូប ការចម្អិន និងការរត់តុដោយខ្លួនឯង សម្រាប់អតិថិជន។ វិញ្ញាសានេះ ផ្ដល់ការវាយតម្លៃពីសមត្ថភាពរបស់បេក្ខជនចំពោះការធ្វើការនៅក្នុងផ្ទះបាយប្រកបដោយវិជ្ជាជីវៈ និងត្រួតពិនិត្យប្រតិបត្តិការភោជនីយដ្ឋាន។

សូមរង់ចាំទស្សនាការប្រកួតប្រជែងដ៏រំភើប និងស្វិតស្វាញនៅក្នុងកម្មវិធី MasterChef Cambodia រដូវកាលទី៣ ដែលគ្រោងនឹងចាក់ផ្សាយនៅលើកញ្ចក់ទូរទស្សន៍ CTN ក្នុងពេលឆាប់ៗនេះ ដើម្បីអ៊ុតមើលថាតើបេក្ខជនទាំងអស់ នឹងត្រូវឆ្លងកាត់វិញ្ញាសាអ្វីខ្លះ? MasterChef Cambodia នឹងមិនធ្វើឱ្យទស្សនិកជនខកបំណងឡើយ!

អត្ថបទទាក់ទង