ផ្លឹស-ខេអេក ញូវ

ក្រុមសិស្សសាលាអន្តរជាតិសៅប្រ៊ីដកម្ពុជា ធ្វើទស្សនកិច្ចសិក្សាលើវិស័យសារព័ត៌មាន នៅក្រុមហ៊ុន CBS ជាលើកដំបូង

សង្គម
March 7th, 2024 (2 years)
Views: 322
Share

ភ្នំពេញ៖ ក្រុមសិស្សសាលាអន្តរជាតិសៅប្រ៊ីដកម្ពុជា (Southbridge International School Cambodia) បានអញ្ជើញមកទស្សនកិច្ចសិក្សាលើវិស័យសារព័ត៌មាន នៅក្រុមហ៊ុន Cambodian Broadcasting Service (CBS) ជាលើកដំបូង នៅព្រឹកថ្ងៃទី០៧ ខែមីនា ឆ្នាំ២០២៤។

នាឱកាសនេះ មានការអញ្ជើញទទួលក្រុមសិស្សសាលាអន្តរជាតិសៅប្រ៊ីដកម្ពុជា ដោយគណៈគ្រប់គ្រងរបស់ក្រុមហ៊ុន CBS ក្នុងនោះ រួមមានលោក David Ulmer នាយកប្រតិបត្តិ និងថ្នាក់ដឹកនាំរបស់ទូរទស្សន៍ CNC ដែលដឹកនាំដោយលោកជំទាវ អ៊ុង ច័ន្ទសោភា នាយិកាព័ត៌មាន រួមទាំង លោកស្រី កង កល្យាណ នាយិការងព័ត៌មាន និង លោក ដួង សុខា ផលិតករជាន់ខ្ពស់ និងនាយកសម្របសម្រួល រួមទាំងសហការីជាច្រើននាក់ទៀត។

ក្នុងគ្រានេះ លោកជំទាវ អ៊ុង ច័ន្ទសោភា នាយិកាព័ត៌មាន បានលើកឡើងថា ដើម្បីក្លាយជាអ្នកសារព័ត៌មានឆ្នើមចាំបាច់ណាស់ត្រូវមានចំណេះដឹងទូលំទូលាយ ការស្រាវជ្រាវ និងការអានឱ្យបានច្រើន។

ជាមួយគ្នានេះ លោកជំទាវនាយិកាព័ត៌មាន បានថ្លែងថា អ្វីដែលសំខាន់សម្រាប់អ្នកសារព័ត៌មានគឺការគោរពពេល និងវិន័យ រួមទាំងក្រមសីលធម៌វិជ្ជាជីវៈផងដែរ។

ទន្ទឹមនឹងនេះ ការចេះប្រើប្រព័ន្ធបច្ចេកវិទ្យា ក៏ដូចជាប្រព័ន្ធឌីជីថល នឹងជួយធ្វើឱ្យសារព័ត៌មានកាន់តែទំនើប លឿនរហ័ស និងទាន់សភាពការណ៍ ស្របតាមបរិបទសង្គមបច្ចុប្បន្ន។ នេះជាការថ្លែងបញ្ជាក់របស់លោកជំទាវនាយិកាព័ត៌មាន។

ក្នុងឱកាសនេះ ក្រុមសិស្សសាលាអន្តរជាតិសៅប្រ៊ីដកម្ពុជា ក៏បានបង្ហាញនូវចំណាប់អារម្មណ៍យ៉ាងខ្លាំងក្នុងការស្រលាញ់ពេញចិត្តចាប់យកអាជីពលើវិស័យសារព័ត៌មាន។ ក្នុងនោះក៏មានសំណួរជាច្រើនពីក្រុមសិស្សសាលា ហើយតំណាងក្រុមហ៊ុន CBS ក៏បានបង្ហាញនូវទីតាំងផ្សាយ និងរបៀបនៃការផលិតកម្មវិធីផ្សេងៗ ព្រមទាំងការផ្សព្វផ្សាយផងដែរ។

សូមបញ្ជាក់ថា ក្រុមហ៊ុន Cambodian Broadcasting Service ហៅកាត់ថា CBS ត្រូវបានបង្កើតឡើងតាំងពីឆ្នាំ២០០៣ ដែលបច្ចុប្បន្ននេះ រួមមាន CTN, MyTV, CNC និង CBS Digital។ ក្រុមហ៊ុន CBS គឺជាក្រុមហ៊ុនដែលនាំមុខគេលើប្រព័ន្ធផ្សព្វផ្សាយនៅក្នុងព្រះរាជាណាចក្រកម្ពុជា៕

អត្ថបទទាក់ទង