ផ្លឹស-ខេអេក ញូវ

ភ្នំសំពៅ ទាក់ទាញទេសចរច្រើនកុះករក្រោយការរៀបចំថ្មី មានផ្សាររាត្រី និងភ្លើងពណ៌ដ៏ស្រស់ស្អាត

កម្សាន្ត
May 13th, 2024 (2 years)
Views: 612
Share

ដើម្បីទាក់ទាញកំណើនភ្ញៀវទេសចរក្នុង និងក្រៅស្រុកឱ្យមកទស្សនាក្នុងខេត្តបាត់ដំបង មន្ទីរខេត្តបាននិងកំពុងកែច្នៃតំបន់ទេសចរណ៍ភ្នំសំពៅ ប្រែក្លាយជារមណីយដ្ឋានឈានមុខគេ ក្នុងខេត្តបាត់ដំបងក្នុងឆ្នាំ២០២៤នេះ។ នេះបើតាមការបញ្ជាក់ឱ្យដឹងពីលោក ហម អរុណ អនុប្រធានមន្ទីរទេសចរណ៍ខេត្តបាត់ដំបង។

លោកបានបន្តថា ដើម្បីឱ្យពិភពលោកបានស្គាល់កាន់តែច្រើននូវផលិតផល និងម្ហូបអាហារដែលជាស្នាដៃកូនខ្មែរ មន្ទីរខិតខំកែច្នៃបន្ថែមទៀតនៅតំបន់ភ្នំសំពៅលើពីសក្ដានុពលដែលមានស្រាប់នៅតំបន់នេះឱ្យក្លាយជារមណីយដ្ឋានឈានមុខគេនៅក្នុងខេត្តបាត់ដំបង។

បច្ចុប្បន្នមានការសាងសង់ និងមានរៀបចំបំពាក់ភ្លើងពណ៌ សម្រាប់ភ្ញៀវកម្សាន្តពេលរាត្រី ដែលមើលទៅហាក់ដូចជាផ្សាររាត្រីដ៏ទំនើបបែបធម្មជាតិមួយ ធ្វើឱ្យអារម្មណ៍ភ្ញៀវទេសចរស្រស់ស្រាយ។

ទន្ទឹមនេះ អនុប្រធានមន្ទីរទេសចរណ៍ខេត្តរូបនេះក៏បានអំពាវនាវដល់ភ្ញៀវក្នុងស្រុកចូលរួមមកកម្សាន្តទាំងអស់គ្នា នឹងជួយលើកកម្ពស់ផលិតផល និងម្ហូបអាហារក្នុងស្រុក ឱ្យកាន់តែផុលផុសបន្ថែមទៀត។

ភ្នំសំពៅ ជាឈ្មោះភ្នំមួយស្ថិតក្នុងស្រុកបាណន់ ខេត្តបាត់ដំបង មានចម្ងាយ ១២ គីឡូម៉ែត្រពីទីរួមខេត្តបាត់ដំបង ត្រូវបានដាក់បញ្ចូលជារមណីយដ្ឋានវប្បធម៌ប្រវត្តិសាស្ត្រដ៏ពេញនិយម សម្រាប់បម្រើដល់វិស័យទេសចរណ៍ក្នុងខេត្តបាត់ដំបង។ ភ្នំនេះមានល្អាងរហូតដល់ ១២ ប្លែកពីគ្នា មានកម្ពស់ប្រមាណ ១០០ ម៉ែត្រ កាំជណ្ដើរឡើងចំនួន ១០៣០ កាំ មានទីតាំងស្ថិតនៅតាមដងផ្លូវជាតិលេខ ៥៧ (អតីតផ្លូវជាតិលេខ១០) ស្ថិតក្នុងឃុំភ្នំសំពៅ ស្រុកបាណន់ ខេត្តបាត់ដំបង។

នៅលើកំពូលភ្នំនេះ មានវត្តមួយឈ្មោះថា វត្តគិរីរម្យ និងល្អាងរូងទាំង ១២ លើភ្នំនេះមានដូចជា ល្អាងផ្កាស្លា, ល្អាងគក់ទ្រូង,ល្អាងខ្យល់,ល្អាងតែងខ្លួន,ល្អាងល្ខោន, ល្អាងជ្រៃ, ល្អាងពេជ្រ, ល្អាងខ្វែង, ល្អាងប្រេង, ល្អាងស្ថានីយ ឬល្អាងធំ, ល្អាងក្បាលខ្មោច និងល្អាងប្រចៀវ។ ក្នុងចំណោមល្អាងទាំង ១២ ភ្ញៀវទេសចរនិយមចូលទស្សនាតែល្អាងផ្កាស្លា និងល្អាងល្ខោនប៉ុណ្ណោះ។

ការទស្សនាទិដ្ឋភាពហ្វូងសត្វប្រជៀវរាប់លានក្បាល ដែលហោះចេញពីល្អាងនៅពេលល្ងាច ដែលអ្នកស្រុកតែងនិយមនាំគ្នាហៅហ្វូងប្រជៀវទាំងនោះថាកងទ័ពប្រជៀវដ៏ក្លាហាន ជាចំណីទាក់ទាញអ្នកទេសចរចង់ទៅទស្សនាភ្នំសំពៅ ខណៈក្បួនហោះហើររបស់ហ្វូងប្រជៀវនេះ ប្រៀបបានទៅនឹងចរន្តទឹកហូរលើផ្ទៃអាកាស ដែលការហោះហើររបស់ហ្វូងសត្វប្រជៀវនៅចន្លោះម៉ោង ៥:៣០ នាទី ដល់ម៉ោង ៦:១៥នាទីល្ងាច គឺជាពេលវេលាដែលហ្វូងសត្វប្រជៀវចាប់ផ្ដើមហោះហើរបណ្ដែតខ្លួនចេញពីរូងភ្នំ ធ្វើឱ្យមានការចាប់អារម្មណ៍យ៉ាងខ្លាំងពីភ្ញៀវជាតិ និងអន្តរជាតិ ទើបនៅតំបន់មួយនេះ ត្រូវបានមន្ទីរទេសចរណ៍ខេត្តបង្កើនការកែច្នៃបន្ថែមដើម្បីទាញកំណើនភ្ញៀវក្រៅស្រុក កាន់តែមានកំណើនខ្ពស់៕

អត្ថបទទាក់ទង