ផ្លឹស-ខេអេក ញូវ

រូប Selfie របស់អត្តពលិកកូរ៉េខាងជើងជាមួយអត្តពលិកកូរ៉េខាងត្បូង កំពុងផ្ទុះការចាប់អារម្មណ៍ខ្លាំង

កីឡា
July 31st, 2024 (2 years)
Views: 451
Share

រូបភាពរបស់អត្តពលិកវាយកូនឃ្លីលើតុរបស់ប្រទេសកូរ៉េខាងជើង និងអត្តពលិករបស់ប្រទេសកូរ៉េខាងត្បូង ដែលបានថត Selfie នៅលើវេទិកាប្រគល់មេដាយនៅទីក្រុងប៉ារីស ក្នុងព្រឹត្តិការណ៍អូឡាំពិក២០២៤ បានផ្ទុះការចាប់អារម្មណ៍ខ្លាំងនៅក្នុងប្រទេសកូរ៉េខាងត្បូងកាលពីថ្ងៃពុធ ដែលត្រូវបានសារព័ត៌មាននានាចុះផ្សាយថាជារូបភាពដ៏កម្រនៃការរួបរួមគ្នា។

ក្នុងវិញ្ញាសាវាយគូចម្រុះ កីឡាវាយកូនឃ្លីលើតុ កូរ៉េខាងត្បូងបានឈ្នះមេដាយសំរឹទ្ធ។ ចំណែក កូរ៉េខាងជើង បានឈ្នះមេដាយប្រាក់។ ខណៈប្រទេសចិន បានក្លាយជាម្ចាស់មេដាយមាស ក្នុងវិញ្ញាសាមួយនេះ។

បន្ទាប់ពីការប្រកួតចប់និងការប្រគល់មេដាយរួច កីឡាករកូរ៉េខាងត្បូង Lim Jong-hoon បានថតរូបរួមគ្នាជាមួយអត្តពលិកប្រទេសទាំងពីរ។ ក្នុងនោះ មានអត្តពលិករបស់កូរ៉េខាងជើង គឺ Ri Jong Sik និង Kim Kum Yong, កីឡាការិនី Shin Yu-bin របស់កូរ៉េខាងត្បូង និងអត្តពលិករបស់សាធារណរដ្ឋប្រជាមានិតចិន ដែលទទួលជ័យជម្នះ រួមមានកីឡាករ Wang Chuqin និងកីឡាការិនី Sun Yingsha ។

វាជាលើកទីមួយហើយដែលកូរ៉េខាងជើងបានឡើងលើវេទិកាអូឡាំពិកចាប់តាំងពីឆ្នាំ២០១៦ ក្រោយប្រទេសនេះមិនបានបញ្ជូនអត្តពលិកទៅចូលរួមប្រកួតកីឡាអូឡាំពិក នៅទីក្រុងតូក្យូ ដោយសារតែជំងឺរាតត្បាតកូវីដ១៩៕

អត្ថបទទាក់ទង