ផ្លឹស-ខេអេក ញូវ

ទោះបានឈ្នះក្នុងការដឹកនាំដំបូងគ្រូ Leicester City ថា ក្រុមខ្លួនត្រូវការអភិវឌ្ឈបន្ថែម

កីឡា
December 4th, 2024 (2 months)
Views: 149
Share

គ្រូបង្វឹកថ្មីរបស់ Leicester City លោក Ruud van Nistelrooy បាននាំយកភាពភ្លឺស្វាងមកកាន់ក្រុមវិញ បន្ទាប់ពីបានយកឈ្នះ ការប្រកួតក្របខណ្ឌ Premier League ទល់នឹងក្រុម West Ham United កាលពីយប់មិញ។

ជំនួបដែលធ្វើឡើងនាកីឡដ្ឋាន King Power ក្រុម Leicester City បានបង្ហាញទម្រង់លេងល្អប្រសើរក្រោមការដឹកនាំ របស់បុរសវ័យ៤៨ឆ្នាំ ព្រោះបើទោះជាពួកគេបានរងការគាបសង្កត់ពីក្រុមគូប្រជែង ប៉ុន្តែក្រុមម្ចាស់ផ្ទះមួយនេះនៅតែអាចមានការវាយប្រយុទ្ធយ៉ាងក្លៀវក្លា។

ការប្រកួតដំណើរការបានតែ២នាទី Leicester City ក៏អាចរកបានគ្រាប់បើកឆាក ដោយការស៊ុតបញ្ចូលទីរបស់ Jamie Vardy។ យ៉ាងណា បន្ទាប់ពីនោះមកភាពស្ងប់ស្ងាត់គ្មានគ្រាប់បាល់កើតឡើង បានបន្តដល់ចប់វគ្គទី១។

ឈានចូលដល់វគ្គទី២ Leicester City កាន់តែមានទម្រង់លេងគួរអោយចាប់អារម្មណ៍ ហើយនាទី៦១ពួកគេរកបានគ្រាប់ទី២ ដោយ Bilal El Khannouss នៅនាទី៦១។ នាទី៨១ Bobby Decordova-Reid បានរកគ្រាប់បញ្ចូលទីសម្រាប់ Leicester City ទៅហើយ ប៉ុន្តែត្រូវបានអាជ្ញាកណ្តាលបដិសេធក្រោយពិនិត្យ VAR ឃើញថាជាបាល់ Offside។ យ៉ាងណា ក្រុមកញ្ជ្រោងនៅតែអាចរកបានគ្រាប់ទី៣របស់ខ្លួនបានដដែល ដោយការស៊ុតរបស់ Patson Daka នៅនាទី៩០។ រីឯក្រុម West Ham United វិញ បានប្រឹងប្រែងវាយសម្រុករហូតអាចរកបាន១គ្រាប់ នៅនាទី៩០+៣ ប៉ុន្តែ មិនអាចស្រោចស្រង់ស្ថានការណ៍របស់ពួកគេបាននោះទេ។ លទ្ធផលបញ្ចប់ការប្រកួតគឺ Leicester City ៣ West Ham United ១។

នេះជាជ័យជំនះក្រោមការដឹកនាំលើកដំបូងរបស់លោក Ruud van Nistelrooy ហើយក៏ជាជ័យជំនះដំបូងរបស់ Leicester City នៅក្របខណ្ឌ Premier League ក្រោយពីមិនឈ្នះ៥ប្រកួតជាប់ៗគ្នារួចមក។ ទោះជាបង្ហាញការដឹកនាំបានល្អប្រកបដោយភាពវិជ្ជមាន និង ទទួលបានជ័យជំនះ ក៏ពិតមែន ប៉ុន្តែលោក Ruud van Nistelrooy នៅតែយល់ថា ក្រុម Leicester City ថ្មីរបស់លោក ត្រូវការការអភិវឌ្ឈបន្ថែមទៀត ទើបអាចប្រកួតប្រជែងជាមួយក្រុមដទៃនៅក្នុងលីគបាល់ទាត់ដ៏តានតឹងមួយនេះបាន។

លោក Ruud van Nistelrooy បានអោយដឹងដូច្នេះ “ក្រោយបានឃើញការប្រកួតរបស់ក្រុម ខ្ញុំមានការពេញចិត្តចំពោះការបង្កើតគំនិតថ្មីរបស់ពួកគេ រួមទាំងទម្រង់នៃការលេង។ គ្រប់គ្នាពិតជារួបរួមគ្នា ធ្វើការងារយ៉ាងល្អ។”

បុរសជនជាតិហូឡង់បន្តថា “ប៉ុន្តែអ្វីដែលខ្ញុំយល់ដឹងបន្ថែមនោះ គឺក្រុមមួយនេះនៅត្រូវការការអភិវឌ្ឈច្រើនទៀត ព្រោះបើទោះជាកីឡាករបានប្រឹងប្រែងយ៉ាងខ្លាំង តែយើងនៅតែមានការប្រកួតដ៏ពិបាកដដែល។ យើងត្រូវធ្វើអោយក្រុមមានភាពរឹងមាំខ្លាំងក្លាជាងនេះទើបអាចឈរជើងលេងក្នុងក្របខណ្ឌ Premier League មួយនេះបាន។”
ជោគជ័យនេះបានធ្វើអោយ Leicester City ឡើងមកឈរលេខ១៥ក្នុងតារាងពិន្ទុ Premier League មាន ១៣ពិន្ទុ ខណៈ West Ham United នៅលេខ ១៤ មាន១៥ពិន្ទុ៕

អត្ថបទទាក់ទង