ផ្លឹស-ខេអេក ញូវ

សង្ខេបរឿងរ៉ាវដែលបានកើតឡើងកាលពីសប្ដាហ៍ទី១ និង២ នៃកម្មវិធី សមរភូមិសំណើច

Football Comedy, កីឡា
December 16th, 2024 (1 year)
Views: 245
Share

កាលពីពីរសប្ដាហ៍ដំបូងនៃកម្មវិធី សមរូភូមិសំណើច បានផ្ដល់នូវសំណើចមិនចេះរីងស្ងួតដល់ទស្សនិកជនរបស់ស្ថានីយទូរទស្សន៍ CTN ខណៈក្លិបបាល់ទាត់ផ្ការីកគ្រប់រដូវ បានជួបនូវឧបសគ្គនៅក្នុងការបង្កើតក្លិបជាលើកដំបូង។ តួអង្គដែលសុទ្ធតែជាតារាកំប្លែង តារាល្បីៗប្រចាំប្រទេស និងអតីតកីឡាករបាល់ទាត់ បានមកប្រមូលផ្ដុំគ្នាដើម្បីរស់នៅជុំគ្នាក្នុងគោលបំណងបង្កើតក្លិបបាល់ទាត់ដ៏ល្អមួយ ដែលពួកគេត្រូវជួបជាមួយឈុតឆាកដ៏ហួសចិត្ត ដែលបង្កើតជាសំណើចពីមួយវគ្គទៅមួយវគ្គ។

នៅក្នុងសប្ដាហ៍ទី១ ក្រុមផ្ការីកគ្រប់រដូវ ត្រូវបានបង្ហាញពីគោលដៅដ៏ខ្ពស់របស់គ្រូបង្វឹកដ៏ម៉ឺងម៉ាត់ លោក ជីងចក់ ប៉ុន្តែបានជួបនូវភាពមិនចុះសម្រុងគ្នារវាងបុគ្គលិក និងកីឡាករតាំងពីដំបូង។ កាប់ពីទែនក្រុម នាយ ពែកមី ជាអ្នកស្វែងរកដំណោះស្រាយដ៏ល្អដល់ក្រុមរបស់គាត់។ រីឯបុគ្គលិក ដែលមានគ្រូពេទ្យ អ្នកសម្អាត សន្តិសុខ និងចុងភៅ សុទ្ធតែជាសាច់ញាតិរបស់គ្រូបង្វឹក លោក ជីងចក់ ។

ឈានចូលដល់សប្ដាហ៍ទី២ មានភាពតានតឹងកើនឡើង បន្ទាប់ពីកីឡាករទាំងអស់ បានហ្វឹកហាត់មិនបានល្អ ការផ្ដល់អាហារដល់កីឡាករយឺតយ៉ាវ និងវិន័យតឹងរ៉ឹងដែលដាក់ដោយគ្រូបង្វឹក។ ចំណែកប្រធានក្លិបបានសន្យាថានឹងផ្ដល់អ្វីៗដែលកីឡាករស្នើសុំ ប្រសិនបើពួកគេអាចក្លាយជាជើងឯកលីគអាជីពរបស់កម្ពុជា ប៉ុន្តែការខកចិត្តនៅតែបន្តកើតមាន។

ការលាយឡំគ្នារវាង កំប្លែង ជម្លោះ និងការឌឺដងគ្នា ក្នុងការរស់នៅប្រចាំថ្ងៃរបស់ក្រុមផ្ការីកគ្រប់រដូវ បានធ្វើឱ្យអ្នកទស្សនាទទួលបាននូវសំណើចមិនចេះជិនណាយ និងការកម្សាន្តគ្មានព្រំដែន។ ទស្សនិកជនចង់ដឹងថាតើសប្ដាហ៍បន្ទាប់នឹងមានរឿងអ្វីកើតឡើងទៀត? រង់ចាំតាមដានសប្ដាហ៍ទី៣ ដែលនឹងចាក់ផ្សាយថ្ងៃសុក្រ ទី២០ ខែធ្នូ វេលាម៉ោង ៧យប់ នៅលើកញ្ចក់ទូរទស្សន៍ CTN តែមួយគត់!

អត្ថបទទាក់ទង