ផ្លឹស-ខេអេក ញូវ

អាជ្ញាកណ្តាលមួយរូបរងការគំរាមកំហែងក្រោយកាត់ក្តីការប្រកួតរវាង Arsenal និង Wolverhampton

កីឡា
January 27th, 2025 (2 years)
Views: 302
Share

គណៈកម្មាធិការមន្ត្រីអាជ្ញាកណ្តាលបាល់ទាត់អង់គ្លេស PGMOL បានអោយដឹងថា មន្ត្រីប៉ូលីសកំពុងស៊ើបអង្កេត ទៅលើការគំរាមកំហែងនិងការរំលោភបំពានទៅលើអាជ្ញាកណ្តាល លោក Michael Oliver បន្ទាប់ពីរូបលោកបានកាត់ក្តីការប្រកួត Arsenal ទល់នឹង Wolverhampton ក្នុងជំនួបក្របខណ្ឌ Premier League កាលពីចុងសប្តាហ៍កន្លងទៅ។

លោក Michael Oliver បានផ្តល់ការពិន័យកាតក្រហមដល់ខ្សែការពារ Myles Lewis-Skelly របស់ Arsenal និងកាតក្រហមដល់ខ្សែបម្រើ João Gomes របស់ Wolverhampton ក្នុងការប្រកួតដែលបញ្ចប់ក្នុងលទ្ធផល Arsenal ឈ្នះ Wolverhampton ១-០។

យ៉ាងណាមិញ បន្ទាប់ពីការសម្រេចចិត្តកាត់ក្តីរបស់លោក Michael Oliver ក្នុងការប្រកួតដែលធ្វើឡើងនាកីឡដ្ឋាន Molineux នោះ ស្រាប់តែលោកត្រូវបានរងការគំរាមកំហែងពីជនអនាមិកជាច្រើន។

ទាក់ទិននឹងបញ្ហានេះ PGMOL បាននិយាយថា “យើងមានការបារម្ភចំពោះការគំរាមកំហែង និងការរំលោភបំពានក្នុងការប្រកួតដែលដឹកនាំដោយលោក Michael Oliver។ គ្មានមន្ត្រីអាជ្ញាកណ្តាលណាម្នាក់ត្រូវទទួលរងនូវការរំលោភបំពានណាមួយឡើយ ប៉ុន្តែលោក Michael Oliver និងក្រុមគ្រួសារ បែរជាទទួលរងការវាយប្រហារដ៏គួរអោយស្អប់ខ្ពើម។ PGMOL និង សហការជាមួយមន្ត្រីប៉ូលីសដើម្បីស៊ើបអង្កេតស្វែងរកជនបង្កបញ្ហាទាំងនោះ។”

សម្រាប់ក្របខណ្ឌ Premier League វិញក៏បានធ្វើការថ្កោលទោសយ៉ាងខ្លាំងចំពោះការគំរាមកំហែង និងការរំលោភបំពានទៅលើមន្ត្រីអាជ្ញាកណ្តាលលោក Michael Oliver។

ដោយឡែក ការសម្រេចចិត្តរបស់លោក Michael Oliver ដែលផ្តល់ការពិន័យទៅលើ កីឡាករ Myles Lewis-Skelly និង João Gomes នោះ ក៏ត្រូវបានរងការរិះគន់ពីអតីតមន្ត្រីអាជ្ញាជាច្រើនរូប និងអ្នកវិភាគផងដែរ ដោយថា នោះជាការពិន័យដែលមិនត្រឹមត្រូវ៕

អត្ថបទទាក់ទង