ផ្លឹស-ខេអេក ញូវ

គ្រូ Arsenal ខកចិត្ត ក្រោយទិញកីឡាករមិនបានក្នុងទីផ្សារដោះដូររដូវរងា

កីឡា
February 5th, 2025 (2 months)
Views: 126
Share

គ្រូបង្វឹក Arsenal លោក Mikel Arteta បាននិយាយថា លោកមានការខកចិត្តចំពោះការខកខាន ក្នុងការចុះហត្ថលេខាណាមួយក្នុងអំឡុងពេលទីផ្សារដោះដូរកីឡាកររដូវរងារ។

Arsenal ត្រូវបានគេរំពឹងថានឹងនាំយកខ្សែប្រយុទ្ធថ្មីណាមួយ បន្ទាប់ពី Gabriel Jesus បានរងរបួសសរសៃពួរ ចុងរដូវកាលមុន ខណៈ Bukayo Saka មិនទាន់ត្រលប់មកវិញពីបញ្ហារបួសរបស់គេទេ។ ទោះយ៉ាងណា ក្លិបកាំភ្លើងធំមិនបានទិញចូលកីឡាករណាមួយទេ ពីក្នុងទីផ្សារដោះដូរកីឡាកររដូវរងា ទោះកន្លងទៅមានការផ្សព្វផ្សាយពីការផ្សារភ្ជាប់ជាមួយកីឡាករជាច្រើនរូបក្តី។

ទាក់ទិននឹងរឿងនេះ លោក Arteta បានអោយដឹងថា “យើងមានបំណងច្បាស់លាស់ដែលតែងតែបើកទ្វារដើម្បីស្វែងរកឱកាសក្នុងការកែលម្អក្រុមរបស់យើង។ ដោយសារកីឡាកររបួស ពួកយើងរងផលប៉ះពាល់ ហើយយើងមិនបានសម្រេចការចុះហត្ថលេខាណាមួយសោះ។ ខ្ញុំខកចិត្ត ប៉ុន្តែយើងក៏ដឹងដែរថា យើងត្រូវមានវិន័យខ្លាំងជាមួយរឿងនោះ។”

បុរសជនជាតិអេស្ប៉ាញបន្តថា “ទោះយ៉ាងណា សម្រាប់កីឡាករបច្ចុប្បន្ន យើងជឿថាអាចធ្វើអោយក្រុមកាន់តែប្រសើរឡើង។ យើងមានហិរញ្ញវត្ថុមានកំណត់ ហើយនោះជាអ្វីដែលយើងព្យាយាមកែលម្អអ្វីដែលយើងមាននៅពេលនេះ។ កីឡាករត្រូវចេះបត់បែន ហើយខ្ញុំនឹងព្យាយាមសាកល្បងអ្វីថ្មីមួយទៀត សម្រាប់ក្រុម។”

ដោយឡែក អ្នកជំនាញផ្នែកហិរញ្ញវត្ថុបាល់ទាត់នានា បានពន្យល់ថាការមិននាំយកកីឡាករថ្មីរបស់ Arsenal គឺជាការសម្រេចចិត្តដែលធ្វើឡើងនៅក្នុងទីផ្សារដ៏លំបាកសម្រាប់ពួកគេ។

ទោះមិនបាននាំចូលកីឡាករ ប៉ុន្តែ Arsenal ក៏បានបញ្ចេញកីឡាករ៣រូបផងដែរ ដោយមាន Ayden Heaven ទៅកាន់ Man UTD និង Josh Robinson ទៅកាន់ Wigan Athletic និង Marquinhos បានចូលរួមជាមួយ Cruzeiro ក្នុងលក្ខខណ្ឌខ្ចីជើងរហូតដល់ចប់រដូវកាល។

Arsenal កំពុងឈរលេខ២នៅ Premier League ក្រោយឈ្នះ Man City ៥-១ កាលពីចុងសប្តាហ៍មុន តាមពីក្រោយក្រុមកំពូលតារាង Liverpool ចំនួន ៦ពិន្ទុ តែ Liverpool សល់១ប្រកួតក្នុងដៃ ៕

អត្ថបទទាក់ទង