ផ្លឹស-ខេអេក ញូវ

ខ្សែការពារ Joe Gomez របស់ Liverpool អាចអវត្តមានរយៈពេលយូរព្រោះរបួសសរសៃពួរ

កីឡា
February 19th, 2025 (1 year)
Views: 205
Share

គ្រូបង្វឹក Liverpool លោក Arne Slot បាននិយាយថា ខ្សែការពារ Joe Gomez នឹងមិនអាចបង្ហាញខ្លួនរយៈពេលយូរ សម្រាប់ការប្រកួតដែលនៅសេសសល់នៃរដូវកាលនេះ បន្ទាប់ពីរូបគេជួបប្រទះបញ្ហារបួសសរសៃពួរ។

កីឡាករអង់គ្លេស ត្រូវបានប្តូរចេញបន្ទាប់ពីលេងបាន ១១ នាទីក្នុងការប្រកួត FA Cup ជុំទី ៤ ដែល Liverpool ចាញ់ក្រុមលីគទី២ Plymouth Argyle កាលពីថ្ងៃទី ៩ ខែកុម្ភៈកន្លងទៅ។

Joe Gomez ទើបតែបានបង្ហាញខ្លួនជាលើកដំបូងសម្រាប់ការប្រកួតនោះប៉ុណ្ណោះ បន្ទាប់ពីបានសម្រាករយៈពេល៦សប្តាហ៍ដោយសារមានបញ្ហាសរសៃពួរកាលពីមុន ហើយឥឡូវគេបានរងរបួសនេះសាជាថ្មី។

Liverpool នៅមិនទាន់សម្រេចចិត្តថា តើកីឡាករវ័យ២៧ឆ្នាំ ដែលបានលេងត្រឹម ១០ ប្រកួតនៅរដូវកាលនេះ នឹងតម្រូវអោយមានការវះកាត់ព្យាបាលរបួសរបស់គេឬយ៉ាងណានោះទេ។
យ៉ាងណា លោក Arne Slot បាននិយាយថា Joe Gomez អាចនឹងត្រូវឆ្លងកាត់ការវះកាត់ ហើយរូបគេនឹងអវត្តមានរយៈពេលយូរ ថែមទៀតផង។

ទាក់ទិននឹងបញ្ហានេះ បុរសជនជាតិហូឡង់បានថ្លែងដូច្នេះ “វាជាការវាយប្រហារដ៏ធំមួយសម្រាប់ Joe Gomez និងសម្រាប់ពួកយើង។ គេពិតជាប្រឹងប្រែងខ្លាំងណាស់ក្នុងការត្រលប់មកវិញ ហើយបន្ទាប់មកការប្រកួតដំបូងនៅពេលដែលគេត្រលប់មកវិញបន្ទាប់ពី តែគេត្រូវអវត្តមានជាច្រើនសប្តាហ៍ម្តងទៀត។ ដូច្នេះវាតែងតែពិបាកសម្រាប់កីឡាករនៅគ្រប់ផ្នែកនៃរដូវកាលនេះ។ បញ្ហានេះនឹងធ្វើអោយ Joe Gomez នឹងខកខានការប្រកួតជាច្រើននៅចុងបញ្ចប់នៃរដូវកាលនេះ ប៉ុន្តែយើងរំពឹងថាគេនឹងត្រលប់មកវិញនៅក្នុងប្រកួតណាមួយ។”

ដោយឡែក Liverpool នឹងត្រូវប៉ះ Aston Villa នៅកីឡដ្ឋាន Villa Park នៅពាក់កណ្តាលសប្តាហ៍នេះសម្រាប់ជំនួបក្របខណ្ឌ Premier League របស់ពួកគេ។ ក្នុងនោះដែរ Liverpool រំពឹងថា នឹងអាចទទួលបានជ័យជំនះនិងវ៉ាដាច់១០ពិន្ទុ នៅលើកំពូលតារាងលីគកំពូលអង់គ្លេសផងដែរ៕

អត្ថបទទាក់ទង