×

ទន្សោង ៤ក្បាល ត្រូវបាន​រកឃើញ​នៅ​ដែនជម្រក​សត្វព្រៃ​កែវសីមា

មណ្ឌលគិរី៖ បន្ទាប់ពីបានឃើញដានជើងជាច្រើនរបស់សត្វទន្សោង និងតំបន់ដីច្រាប (ដីដែលមានជាតិអំបិលនិងសារធាតុរ៉ែផ្សេងទៀតជាអាហាររបស់សត្វ) ថ្មីមួយកន្លែង ក្រុមស្រាវជ្រាវសត្វព្រៃនៃអង្គការ WCS កម្ពុជា បានដាក់ពង្រាយម៉ាស៊ីនថតស្វ័យប្រវត្តិនៅភាគខាងលិចនៃដែនជម្រកសត្វព្រៃកែវសីមាដើម្បីថតសកម្មភាពសត្វព្រៃកម្រនៅទីនោះ។

រយៈពេលប្រហែលពីរខែក្រោយមក ក្រុមការងារបានទៅប្រមូលយកម៉ាស៊ីនថតទាំងនោះមកវិញ និងបានឃើញថតជាប់រូបភាពសត្វព្រៃមួយចំនួនរួមមាន សត្វទន្សោងមួយក្រុមមាន ៤ក្បាល (ឈ្មោលមួយក្បាល ញីមួយក្បាល និងកូនជំទើពីរក្បាល)។

ដោយសារសត្វទន្សោងដែលថតបានមានចំនួនតិច វាមានការលំបាកសម្រាប់ក្រុមការងារក្នុងការប៉ាន់ស្មានអំពីចំនួនសត្វទន្សោងដែលនៅសេសសល់ក្នុងដែនជម្រកសត្វព្រៃកែវសីមា។ រូបភាពទាំងនេះ មានសារៈសំខាន់ណាស់ក្នុងការបង្ហាញប្រាប់យើងថាសត្វប្រភេទនេះនៅមានវត្តមាននៅឡើយ។

ការដាក់អន្ទាក់និងការប្រើសត្វឆ្កែប្រមាញ់ គឺជាកត្តាគំរាមកំហែងធំពីរ ដែលបណ្តាលឱ្យបាត់បង់ប្រភេទសត្វនេះនៅក្នុងដែនជម្រកសត្វព្រៃកែវសីមា។ សកម្មភាពទាំងនេះ គឺជាអំពើខុសច្បាប់នៅក្នុងតំបន់ការពារធម្មជាតិ និងកំពុងបំផ្លាញដល់សត្វព្រៃនៅកម្ពុជា៕

អ្នកអាចចែករំលែកដោយ៖

អត្ថបទទាក់ទង