ផ្លឹស-ខេអេក ញូវ

ពិបាកគេងអំឡុងពេលពពោះ? ម៉ាក់ៗអាចដោះស្រាយតាមវិធីទាំងនេះ

សុខភាព មាតា ទារក
June 14th, 2023 (3 years)
Views: 510
Share

ពិតណាស់ ស្រីៗយើងជាច្រើន ប្រឈមនឹងបញ្ហាដំណេក អំឡុងពេលពពោះ ដោយសារតែកត្តាផ្សេងៗ ដូចជាការប្រែប្រួលរូបរាងកាយ អ័រម៉ូន និងអារម្មណ៍រំភើប ក៏ដូចជាថប់បារម្ភក្នុងការក្លាយខ្លួនជាម៉ាក់ៗថ្មីថ្មោង។ ជាក់ស្ដែង មានស្ត្រីពពោះប្រហែលជា៥០% កើតជំងឺគេងមិនលក់។
ដូច្នេះហើយ ប្រសិនបើម៉ាក់ៗជួបបញ្ហាគេងមិនលក់នេះ គួរអនុវត្តន៍គន្លឹះមួយចំនួនដូចខាងក្រោម។

ហេតុអ្វីបានជាការគេងប្រែប្រួលអំឡុងពេលពពោះ?

ជំងឺគេងមិនលក់អំឡុងពេលពពោះ អាចបណ្ដាលមកពីកត្តាជាច្រើន ការប្រែប្រួលអ័រម៉ូន និងបញ្ហាមួយចំនួនទៀតដូចជា៖

• ចង្អោរ ឬក្អួត
• ឈឺសុដន់
• ចង្វាក់បេះដូងលោតញាប់
• ហត់
• សីតុណ្ហភាពរាងកាយឡើងខ្ពស់
• នោមញឹកញាប់នៅពេលយប់
• រមួលក្រពើនៅជើង

ម៉ាក់ៗក៏អាចជួបប្រទះនឹងបញ្ហាឈឺខ្នង ព្រមទាំងពិបាករកទីតាំងគេងដែលសមស្របនៅពេលដែលពោះកាន់តែធំទៅៗ ជាពិសេសនៅពេលដែលកូនក្នុងផ្ទៃធាក់នៅពេលយប់។ ទន្ទឹមនឹងនេះដែរ អាការថប់បារម្ភនៅពេលកៀកសម្រាល ក៏អាចរំខានដល់ការគេងដូចគ្នាដែរ។

ហេតុអ្វីបានជាការគេងមានសារៈសំខាន់ខ្លាំង អំឡុងពេលពពោះ?

ការគេងលក់ស្កប់ស្កល់មានសារៈសំខាន់ខ្លាំងណាស់ ទាំងចំពោះម៉ាក់ៗ និងទារកក្នុងផ្ទៃ។ ប្រសិនបើម៉ាក់គេងមិនឆ្អែត នោះនឹងនាំឱ្យអស់កម្លាំង ងងុយគេងនៅពេលថ្ងៃ ព្រមទាំងអាចប៉ះពាល់ដល់ការចងចាំ ចំណង់អាហារ អារម្មណ៍ និងការសម្រេចចិត្ត។ លើសពីនេះ ការគេងមិនលក់រ៉ាំរ៉ៃ ក៏អាចប៉ះពាល់ដល់ប្រព័ន្ធភាពស៊ាំ មានទំនាក់ទំនងទៅនឹងជំងឺទឹកនោមផ្អែមពេលពពោះ សម្ពាធឈាមខ្ពស់ ព្រមទាំងបង្កើនហានិភ័យនៃជំងឺបម្រុងក្រឡាភ្លើងថែមទៀតផង។

គន្លឹះកាត់បន្ថយបញ្ហាគេងមិនលក់អំឡុងពេលពពោះ

១. ជ្រើសរើសទីតាំងគេងដ៏ត្រឹមត្រូវ

ការគេងផ្អៀងទៅខាងឆ្វេង និងអង្កុញជើងបន្តិច ជាឥរិយាបថគេងដ៏ល្អបំផុតនៅអំឡុងពេលពពោះ។ ឥរិយាបថនេះ អាចជួយសម្រួលលំហូរឈាមទៅកាន់បេះដូង តម្រងនោម និងស្បូន ក៏ដូចជាធ្វើឱ្យការបញ្ជូនអុកស៊ីហ្សែន និងសារធាតុចិញ្ចឹមដល់ទារកកាន់តែប្រសើរឡើង។ ប៉ុន្តែ យើងក៏អាចគេងផ្ទៀងទៅខាងស្ដាំដូចគ្នា ដោយប្រើប្រាស់ខ្នើយបន្ថែម ដើម្បីជួយឱ្យគេងលក់ស្រួល។ ជាមួយគ្នានេះដែរ ម៉ាក់ៗអាចកល់ខ្នើយ ដើម្បីទ្រក្បាលពោះ ឬបន្ថែមខ្នើយស្ដើងនៅចន្លោះជង្គង់ ដើម្បីជួយបន្ថយសម្ពាធលើខ្នងផ្នែកខាងក្រោម។

២. រក្សាឥរិយាបថគេងឲ្យបានល្អអំឡុងពេលពពោះ

• គេងនៅក្នុងបន្ទប់គេងដែលត្រជាក់ ងងឹត និងស្ងប់ស្ងាត់ល្អ
• ចូលគេងឱ្យបានទៀងទាត់ និងកំណត់ម៉ោងគេងថ្ងៃឱ្យលឿនបន្តិច ដើម្បីកុំឱ្យរំខានដល់ការគេងពេលយប់
• អានសៀវភៅ ងូតទឹក ឬធ្វើសកម្មភាពងាយៗផ្សេងទៀត នៅមុនពេលចូលគេង
• ជៀសវាងញ៉ាំជាតិកាហ្វេអ៊ីន អាហារហឹរ ឬអាហារច្រើនជ្រុល មុនពេលចូលគេង ដើម្បីកាត់បន្ថយហានិភ័យនៃជំងឺច្រាលទឹកក្រពះ
• បញ្ឈប់ប្រើប្រាស់ឧបករណ៍អេឡិចត្រូនិក ឱ្យបានយ៉ាងហោចណាស់រយៈពេលមួយម៉ោងមុនចូលគេង
• ហាត់ប្រាណជាទៀងទាត់
• ញ៉ាំទឹកឱ្យបានគ្រប់គ្រាន់នៅពេលថ្ងៃ ប៉ុន្តែកាត់បន្ថយការញ៉ាំទឹកនៅមុនពេលចូលគេង ដើម្បីជៀសវាងចូលបន្ទប់ទឹកញឹកញាប់អំឡុងពេលគេង
• ប្រសិនបើម៉ាក់គេងមិនលក់ អាចធ្វើអ្វីផ្សេង រហូតទាល់តែមានអារម្មណ៍ងងុយគេង៕

ប្រភព៖ Hellokrupet

អត្ថបទទាក់ទង