ផ្លឹស-ខេអេក ញូវ

កូនចេញរោគសញ្ញាទាំងនេះ ម៉ាក់ៗគួរប្ដូរម៉ាកទឹកដោះគោហើយ

សម្រស់ជីវិត
December 21st, 2022 (3 years)
Views: 243
Share

ដូចយើងដឹងស្រាប់ហើយថា ទឹកដោះគោម្សៅមានច្រើនម៉ាកសម្រាប់ឱ្យម៉ាក់ប៉ាជ្រើសរើសផ្ដល់ឱ្យកូនបៅ ប៉ុន្តែកូនយើងមិនមែនបៅត្រូវគ្រប់ម៉ាកទឹកដោះគោតែម្ដងនោះទេ។ ជួនកាល អាអូនបៅម៉ាកផលិតផលមួយមិនត្រូវ យើងត្រូវប្ដូរទៅម៉ាកមួយទៀត ពិសេសនោះបើកូនចេញសញ្ញាប៉ុន្មានខាងក្រោមនេះ។

១. ក្អែខ្លាំង
ទារកភាគច្រើនក្អែទឹកដោះម្ដាយ ឬទឹកដោះគោចេញមកវិញក្រោយបៅដោយសារតែប្រព័ន្ធរំលាយអាហាររបស់អាអូនមិនទាន់រឹងមាំនៅឡើយ។ តាមពិតទៅ ទារកក្អែជាបញ្ហាទូទៅមួយ ក្មេងណាក៏ដូចក្មេងណាដែរ ក៏ប៉ុន្តែបើកូនក្អែលើសពីបរិមាណ ពីរស្លាបព្រាបាយ ក្រោយពេលបៅទឹកដោះគោម្ដងៗ អាចជាសញ្ញានៃបញ្ហាប្រតិកម្មនឹងទឹកដោះគោ ម៉ាក់ប៉ាជាការល្អ គួរពិភាក្សាជាមួយគ្រូពេទ្យដើម្បីដឹងថាគួរប្ដូរម៉ាកទឹកដោះគោ ឬយ៉ាងណា។
២. មិនសូវឡើងទម្ងន់
ការតាមដានការឡើងទម្ងន់កូនអាចមានប្រយោជន៍ក្នុងការវាស់ស្ទង់សុខភាពទូទៅរបស់អាអូន។ នៅពេលអាអូនឡើងទម្ងន់បានត្រឹមត្រូវ ម៉ាក់ប៉ាអាចសម្គាល់បានដោយសង្កេតលើចំណុចមួយចំនួន។
អាអូនឡើងទម្ងន់ដូចទម្ងន់ពីកំណើតម្ដងទៀត ១០-១៤ថ្ងៃបន្ទាប់ពីកើត។ ចន្លោះពីកំណើតដល់អាយុ ៣ខែអាអូនឡើងទម្ងន់ប្រហែល ២៨ក្រាម/ថ្ងៃ។ នៅពេលពួកគេឈានដល់អាយុ ៦ខែ អាអូនអាចឡើងទម្ងន់បាណប្រហែល ១៨ក្រាម/ថ្ងៃ។
ប្រសិនបើអាអូនមិនឡើងទម្ងន់ដូចការរំពឹងទុក ឬដូចចំណុចខាងលើទេ ម៉ាក់ប៉ាគួរនាំឱ្យទៅពិភាក្សាជាមួយគ្រូពេទ្យជំនាញ ពិសេសអាអូនមានវ័យលើសពី ៦ខែ ដែលម៉ាក់ៗឱ្យបៅម្សៅទឹកដោះគោ ដើម្បីដឹងថាគួរផ្លាស់ប្ដូរម៉ាកផលិតផលឬយ៉ាងណា។
៣. កិកកុកច្រើនក្រោយបៅ
មានហេតុផលជាច្រើនដែលអាចឱ្យកូនតូចយំ កិកកុក រករឿងម៉ាក់ប៉ា ប៉ុន្តែនៅពេលដែលអាអូនចាប់ផ្ដើមកិកកុកពេលកំពុងបៅទឹកដោះគោ ឬក្រោយបៅ នោះអាចដោយសារកូនប្រតិកម្មនឹងម្សៅទឹកដោះគោ។
៤. ជុះចេញឈាម
ពេលយើងបើកមើលខោទឹកនោមកូនមកឃើញមានឈាម ម៉ាក់ប៉ាណាដែលថាមិនភ័យនោះ។ ស្របពេលដែលមានហេតុផលជាច្រើនបង្កជាបញ្ហាអាអូនជុះមកចេញឈាម តែហេតុផលគួរឱ្យកត់សម្គាល់មួយគឺអាអូនអាចអាលែកហ្ស៊ីទឹកដោះគោម្សៅ ហើយបើកូនចេញរោគសញ្ញានេះ ម៉ាក់ប៉ាគួរនាំកូនទៅជួបគ្រូពេទ្យ។
៥. ទល់លាមករ៉ាំរ៉ៃ
ទារកដែលបៅទឹកដោះគោ ជាទូទៅជុះយ៉ាងតិច ម្ដង/ថ្ងៃ ឬអាច ២ថ្ងៃម្ដង ដែលនេះ មិនមានអ្វីគួរឱ្យបារម្ភទេ។ ផ្ទុយទៅវិញក្នុងករណីកូនជុះមក លាមករឹងដុំៗ និងមានអាការដូចជាឈឺពោះ ឬហើមពោះ ឬជុះតិចជាងបីដងក្នុងមួយសប្ដាហ៍ អាអូនអាចមានបញ្ហាទល់លាមកហើយ។
៦. អាលែកហ្ស៊ីទឹកដោះគោ
អាលែកហ្ស៊ីទឹកដោះគោ គឺជាប្រតិកម្មរវាងប្រព័ន្ធភាពស៊ាំរបស់កុមារទៅនឹងប្រូតេអ៊ីនរបស់ទឹកដោះគោ។ បន្ទាប់ពីញ៉ាំទឹកដោះគោហើយកូនអាចនឹងមានអាលែកហ្ស៊ីប្រសិនបើមានសញ្ញាដូចជា កណ្ដាស់ ពិបាកដកដង្ហើម ក្អក ឈឺពោះ ក្អួត រាក ហូរទឹកភ្នែកព្រមទាំងមានហើម និងរមាស់ មុខឡើងក្រហម ចេញអុជក្រហមលើស្បែក សម្ពាធឈាមធ្លាក់ចុះ ឈឺក្បាល និងអាចដល់សន្លប់ទៀតផង។
បើកូនមានរោគសញ្ញាទាំងនេះ ម៉ាក់ៗអាចពិភាក្សាជាមួយគ្រូពេទ្យ ដើម្បីអាចផ្លាស់ប្ដូរម៉ាកផលិតផលណាមួយដែលសមស្របនឹងកូនរបស់យើង៕

ប្រភព៖ Hellokrupet

អត្ថបទទាក់ទង